Kalaallit danskillu ilaallaqugaluarpaat

- Silap pissusaa pillugu ilisimatuut paasisatik kingulliit aallaavigalugit siulittuutitik ataatsimeersuarnermi saqqummiuttussaavaat, taamaammat politikkikkut aalajangiisartut tunngavissinneqarnissaannut periarfissatsialaalluni, Arctic Frontiersimi allattoqarfiup pisortaa Reinhold Fieler oqarpoq.

Taamatut ataatsimeersuartitsinerit tallimassaat, ukioq manna norgemiunut issittumi ilisimasassarsiortunut Nansenimut Amundsenimullu ukiorititaq pillugu suliaqartunik suleqateqarluni aaqqissorneqarsimavoq.

- Danmarkimiit Kalaallit Nunaanniilluunniit ataatsimeersuarnerup soqutigineqannginnera assut nikalluallannarpoq, issittumimi pisuussutinik silaannaallu kissakkiartorneranik soqutiginnittut nunanit arlalinneersut peqataatitaqassapput, Reinhold Fieler oqarpoq.

Issittumili pissutsit allanngoriartornerat Danmarkimiit malinnaaffigilluarneqaqimmat Silap pissusaa pillugu minisiterip Lykke Friisip Norgemiut isornartorsiuinerat paasiuminaatsippaa.

- Silap pissusaata allanngoriartornerata issittumut sunniuteqarnera nunat tamat suleqatigalugit malinnaaffigiinnarnagu aamma ilisimatusarnermut atatillugu peqataalluarpugut, Lykke Friis oqarpoq.

Ilisimatusarnermi paasisat kingulliit paasisaqarfigilluarniarlugit Lykke Friis sapaatip akunnera ataaseq Tunup avannaani Zackenbergimiissimanerarpoq.

Lykke Friisip ilanngullugu oqaatigaa Danmarki tullianik EU-mi siulittaasunngorpat, issittumi pissutsit sukumiisumik sammineqassasut, maannakkulli ataatsimeersuarnermi peqataanissaminut piffissaqarani.

Nunatsinnilu Naalakkersuisut pingasut, tassaasut Kuupik Kleist, Mimi Karlsen kiisalu Ove Karl Berthelsen Tromsømut qaaqquneqarsimagaluartut ilinniartitaaneq pillugu Ilulissani ataatsimeersuarnissamut peqataassapput.

Nunatsinni sermersuup ataani qaqutigoortunik aatsitassaqarneranut atatillugu kalaallit qanoq pilersaaruteqarnersut Tromsømi Arctic Frontiersimeersut