Kalaallit Danmarkimiittut palasissaannik atorfinitsitisoqassasoq
Aningaasaliissutit kalaallinut Danmarkimut namminneerlutik nuussimasunut aamma sullissinissamut naammanngitsut, Nunatta biskoppiata Sofie Petersenip uppernarsarpaa, aaqqiisoqarnissaali sulissutigineqartoq aamma oqaatigineqarpoq.
Kalaaleq Henriette Berthelsen Danmarkimi ukiuni 37-ni najugaqarnikuuvoq. Kalaallit Danmarkimiittut palasimik sullinneqarnissaminnik qinnuteqarsimagaluartut, itigartinneqarsimasulli, taassuma ilisimavai.
- Ilaqutariit kalaallit toqusoqarlutik kalaallisut iliserusukkaluarlutik maanna itigartitaasalernikuupput. Tamanna naammaginanngilluinnarpoq, taamaattoqartussaanngilaq. Anersaakkut inuuneq uanga isumaga malillugu taamatut killilersorneqartussaanngilaq, Henriette Berthelsen oqarpoq.
- Palasip kalaallip kalaallinut Danmarkimiittunut sunniutai annertoorujussuupput. Katersuuffiugami. Kulturikkut kinaassusertik anersaakkut aamma malugerusuttaramikku. Kuisitsinermi, katinnermi assigisaanullu. Tassa ulluinnarni annertuumik atorfissaqartippaat, pisariaqartillugulu, Henriette Berthelsen oqarpoq, kalaallit Danmarkimut nuuttut amerliartornerat aamma eqqarsaatigineqartariaqarnerarlugit:
- Kalaallisuinnangajak oqaluttut maannga nuuttartut aamma amerliartorput. Allatulli palaseqarnissaq pisariaqartittorujussuuarput. Kirkeskatimut 16 milllionit koruunit sinnerlugit maani akiliisarpugut. Tamakku eqqarsaatigalugit palaseqarfimminngaanniit pitsaanerusumik ikiorneqartussaagaluarpugut, Henriette Berthelsen oqarpoq.
Kalaallilli Danmarkimi najugallit palaseqalernissaat sulissutigineqaleruttorpoq. Danmarkimi ilagiit aningaasaliiffigineqarnissaat pillugu Folketingimi aalajangiisoqaqqammerpoq, kalaallillu palasimik sullinneqarsinnaalernissartik naatsorsuutigisinnaassagaat, Danmarkimi ilageeqarnermut ministereqarfimmi allaffimmi pisortap Pernille Esdahlip oqaatigaa:
- Danmarkimi ilagiit aningaasalersorneqartarnerat pillugu aaqqiisoqarnissaa, folketingip aalajangeqqammerpaa, palasinillu atorfinitsitsisinnaanissaq tassani ilaavoq, kalaallillu namminneerlutik Danmarkimut nuussimasut palaseqalersinnaanissaat tassuunatigut ammaaffigineqarpoq, Pernille Esdahl, Danmarkimi ilageeqarnermut ministereqarfimmeersoq oqarpoq.
