Kalaallit Danmarkimiittut aamma malunnartitsiniarput

Ilaatigut Aalborgimi kalaallit illuat assigiinngitsorpassuarnik sammisaqartitsiniarluni pilersaaruteqarpoq.

Ilaatigut qulimiguulimmut ilaanissaq periarfissaavoq, aamma puisip qanoq pilanneqartarnera takutinneqassaaq. Tamakkua saniatigut nipilersortussarpassuaqarpoq - ilaatigut Agga Dam erinarsussalluni, Aqqaluk Fisker qilaatersussaaq John Davidilu rapperluni tusarnaartitsissalluni.

Sammisassanut ilaapput kalaallinut tunngasunik filmiliat, naggueqatigiit Inuit pinnguaataat, umimmaap neqaanik misiliisitsineq, ullorlu naggaserlugu Aalborgimi kalaallit Illuanni kaffillertoqassaaq.

Aamma Danmarkimi kalaallit innarluutillit qajartornermut peqatigiiffiat, Saqqit, ullormik malunnartitsiniarpoq.

Kalaallit ineriartornermikkut innarluutillit peqatigiiffiup qaaqqusimavai, ullormillu malunnartitsiniarnermi peqataatinniarai, Sermitsiami allaaserineqarpoq.

- Tassami innarluutillit taakkua oqaluttuarisaanermi nutaami ilaapput, kalaallillu oqaluttuarisaanerminni namminersornermut alloriarneranni puigorneqartariaqaratik, peqatigiiffimmut Saqqimmut siulittaasoq Poul Hansen oqarpoq.

Peqatigiiffik aamma umiamik 10 meterinik takissusilimmik sanatitsisimavoq, aqagu takuteqqaarneqartussamik.