Kalaallit Danmarkimi immikkoortitaapput
Kalaallit Aalborgimi eqqaanilu najugallit Kofoeds Skole-mit ikioqqullutik saaffiginnittartut malunnaateqarluartumik amerlisimapput. Aamma Danmarkimi najugaqarnissaminnik qinnuteqartarneri oqartussanit sivisuumik suliarineqareeraagamik aatsaat allattorsimaffimmiisinneqalertarsimapput.
- Tamanna kusanaaqaaq. Kalaallit qallunaatut innuttaassuseqarput, Kalaallit Nunaanniit Danmarkimut nuuttut eqqarsaatigalugit, qallunaat allat assigalugit taakku taamaaqqataannik pineqartariaqarput, Martin Henriksen oqarpoq.
Tamannalu tunngavigalugu, Martin Henriksenip Isumaginninnermut ministeri peqquaa, ajornartorsiut tamanna aaqqinniassagaa, kalaallit amerlanerit inuuniarnermikkut ajornartorsiortartut amerlivallaannginneranni.
Tamatumunnga peqatigitillugu Martin Henriksenip piumasaraa, kalaallit Danmarkimi Nunatsinnilu inuuniarnermikkut ajornartorsiuteqartut kommuninit nalunaarsukkat tunngavigalugit Benedikte Kiær nalunaarusioqqullugu.
Kalaallit 2009-mi Kofoeds Skolemut ikioqqullutik nalunaarsimasut 90-iusimapput. Siorna kisitsit taanna marloriaatinngorsimavoq, tassa 180-it nalunaarsimagamik. Ukioq manna imaaliinnartoq nalunaartut 139-it angusimalerpaat, taakkulu inissaqannginnertik, ikiuutisiaqannginnertik aamma atuartuutimik atuarfissaannut ikioqqunertik tunngavigalugu kommuninut nalunaarsimapput. Kommuninut saaffiginnut ilaat ukioq ataaseq utaqqisimapput.
- Danmarkimi innuttat danskiusut illoqarfimmiit illoqarfimmut nuuttut ullualunngit atorlugit allattorsimaffinniilersarput. Nuummiit Aalborgimut nuukkaanni aamma taama sivikitsigisumik utaqqisoqartartussaagaluarpoq, folketingimi Isumaginninnermut ataatsimiititaliami siulittaasoq Martin Henriksen oqarpoq.
