Kalaallit Danmarkimi atugarliortut pillugit ataatsimiittut
Danmarkimi kalaallit illuisa sisamaasut isumaginninnermut suliniutaasa aningaasatigut qanoq inissisimanissaat paasisaqarfigissallugu pisariaqartoq, Sara Olsvigip ataatsimiinnermi tikkuarpaa. Kalaallit illui kalaallinut atugarliortunik sullissiniarnerminnut atatillugu aningaasanik ukiormanna siusinnerusukkut qinnuteqaraluaramik itigartitaapput.
Isumaginninnermut ministerip 2013-imit 2016-imut isumaginninnermut akuunerulersitsinissamullu suliniutinut isumaqatigiissutissap oqaasertassai, sapaatip akunnerani kingullermi saqqummiuppai. Taakkunani ukiuni sisamani atuuttussatut Danmarkimi kalaallinut atugarliortunut meeraanullu suliniarnermi atugassanngortinniarneqarput.
Sara Olsvigip oqaatigaa, 13,4 millionit koruunit isumaginninnermi atugarliortunut suliniutinut ilanngullugit atorneqassasut, ukiunilu kingullerni pineqartunut ilisimalikkatut ineriartortinneqarsimasut attaveqaatillu ingerlateqqinneqassasut ineriartortinneqarlutillu.
Tamatuma akerlianik kalaallit illuini isumaginninnikkut suliniutit siunissami qanoq inissisimanissaat suli nalorninartoqarpoq. Isumaginninnermulli ministerip erseqqissarpaa, suliniutit ikaarsaariarnermi 2013-imi atugassanik isumannaarneqareersut, taakkulu ukiormanna aningaasaliissutit amerlaqatigissagaat. Tamatumanili kalaallit illuisa ukioq naatinnagu tapiiffigeqqullutik qinnuteqaateqarnissaat piumasaqaataavoq.
Kalaallit illuisa suliniutiminnut 2012-imit 2015-imut katillugit 11,3 millionit koruunit amigaatigaat.
Taamaattorli tassa kalaallit illuisa suliniutitik aappaagu ingerlateqqissinnaassavaat.
- Maannali suliniutinut siunissami aalajangersimasumik tapiisoqartarnissaata qulakkeernissaa kisimi amigaataalerpoq, taamaalillunimi kalaallit illuisa suliaat pingaarutillit qulakkeerneqarniassammata ingerlateqqinneqarlutillu, Sara Olsvig naggasiivoq.
