Kalaallit D-vitaminissaaleqinngillat
Nappaatinut soorlu saarngit napialernerinut aamma nappaatinut allanut soorlu uummatip taqarsuatigut nappaateqalersinnaanermut kræftimullu D-vitaminit pinngitsoortitsisinnaalluartut paasineqartunut ilaapput.
Inuit paasiniaanermi misissorneqartut tamarmik D-vitamininik amigaateqanngillat, taakkulu napparsimalernissaat ilimanarpiarani.
Nunatsinni sila ilaatigut nillerluni atoruminartanngikkaluartoq aamma atisanik oqortunik atuineq annertugaluartoq aasamilu kiassiutip qulit qummut qaangerpiartanngikkaluaraa, taamaattoq kalaallit D-vitaminimik amigaateqanngillat. Taamaattoqarnera ilisimatuunit ilimagineqarsimanngikkaluarpoq.
Nunarsuatta qiterpiaani ækvatorimi, seqerngup qinngualaneri nunarsuatta silaannartaatigut akornuteqaratit nunamut ammorluinnaq ingerlaannartartut, nunarsuatta avannaanut tukimut ingerlaarlutik nunamut tuttarput taamaalilluni seqerngup qinnguai ulorianarsinnaasut annikinnerulersillugit.
Seqerngup qinnguaanit timerput D-vitaminilersorneqartarpoq, tassalu seqineqarpianngikkaagat D-vitaminilersorneqarnerput annikinnerusarluni.
Taamaakkaluartoq nunarsuattalu avannaani najugaqaraluarluta, timerput D-vitamininik amingaateqanngitsoq ilisimatuut misissuinerisa takutippaat. Misissuinermi nakorsaq aamma Kalaallit Nunaat pillugu misissuinermi qullersaqarfiata pisortaa, Stig Andersen siuttuuvoq.
Qeqertarsuup Tunuani inuit 97-it ukiup ataatsip iluani misissorneqarput. Misissorneqartullu D-vitamininik timaasa pissarsisarneri upernaakkut aasamilu pinerusartoq paasineqarluni. Kalaallit nerisaat soorlu aalisakkat, puisit aamma arferit, D-vitamininik pissarsissutaalluartartut, misissukkat ukiuinut suiaassusaannullu sanillersuunneqarput, seqerngup D-vitaminit inuit pissarsiarisartagaannit nerisartakkat tamakku immikkoortinneqarlutik.
Seqerngup qinnguaanit D-vitamininik pissarsiaqartarnerput allanut tamanut sanilliullugu annertuneruvoq. Avannaani ukiukkut kaperlattarpoq, taamaattumillu piffissami tassani D-vitaminik, seqerngup piliaanit pisariaqartitanik pissarsiffiussanani.
Kalaallit timaanni D-vitaninimik pilersuinerup annertunerata paasineqarneranut pissutaavoq, soorlu Qeqertarsuup Tunuani aasanerani naqitsinertuffiit pissutaallutik seqinnarilluartarmat upernaakkullu apummut sermimullu seqerngup qinnguaasa torartarneri D-vitamininik pissarsilluarfiusarlutik.
Misissuinermi paasineqartunut ilaavoq timip qanoq sananeqaatai naapertorlugit inuk D-vitamininik pissarsisartoq. Tamannalu paasisaq naapertorlugu maanna paasiniarneqarpoq, Nunatsinni qallunaat najugaqartut kalaallinut naleqqiullutik qanoq D-vitamininik pissarsiaqartarneri innersut. Paasiniaanermi suleqatigineqarput, Dronning Ingridip Napparsimmavissuata nakorsiartarfiani nakorsaq, Hanne Lynge Rex aamma Napparsimmavissuarmi Medicinsk Afdeling Laboratorialu.