Assi: Simon Uldum

Kalaallit atornerluisuusut ikorfartoqatigiiffeqalersut

Imigassamik ajornartorsiuteqartunut allatigullu atornerluisunut katsorsartinnissamik tapersersorneqarnissamillu Odensemi neqerooruterpassuaqarpoq, oqaatsivulli atorlugit periarfissaqanngilaq. Siornatigut imigassamik ajornartorsiuteqarsimasup Akvilas Lundbladip tamanna allanngortikkusullugu iliuuseqarfigaa.

Akvilas Lundblad kalaaleqatini marluk peqatigalugit kalaallinut atornerluisuusunut Odensemi ikorfartoqatigiiffimmik pilersitseqqammerpoq. Inimi oqaluffimmit Akvilas Lundbladip attaveqarfigisaanit akeqanngitsumik atukkiunneqartartumi periarfissaqaraangamik arfininngornikkut naapittarput.

- Ikorfartoqatigiiffik imigassamik ajornartorsiutilinnut neqeroorutaavoq, allalli aamma tikilluaqqusaapput. Ilaqarpugummi aamma ikiaroornartumik oorinoornermillu ajornartorsiuteqartunik. Ajornartorsiutit tamakkua peqatigiillugu oqaluuseralugit immitsinnut ikorfartoqatigiilluta qaangerniarsinnaavagut, Akvilas Lundblad KNR-imut taama oqarpoq.

AAMMA ATUARUK Aalborgimi oqaatsivut atorlugit atornerluinermut katsorsaasalerniartut

Oqaatsit ikiortissarsiornissamut killeqartitsisut

Akvilas Lundblad oqaluttuarpoq imigassamik ajornartorsiuteqarneq qaangerniaraanni nassuerutiginninnissaq pingaarnerpaajusoq. Kalaallilli atornerluisuusut Danmarkimi ikiortissarsiornissaminnut ajornakusoortitsisarput, ilaat danskisut oqalussinnaannginnamik imaluunniit misigissutsiminnik danskisut oqaasinngortitsinissaminnut nalornisoortaramik.

- Periarfissaqaraangama danskinut AA-rtartunut pingasunngornikkut peqataasarpunga. Qallunaatut oqalulluarsinnaavunga, kisianni oqaatsit ataasiakkaat nalornisoorutigisinnaasarpakka. Taamaalillunga misigissutsikka qamaniittut oqaasinngortinnissaat ajornakusoortittarpara, danskisut oqaatiginissaat nalornissutigisarakku, Akvilas Lundblad taama oqaluttuarpoq.

Taamaammat Akvilas Lundbladip oqaatsivut atorlugit AA-rtitsisarnermik aallartitsinissamik eqqarsaateqalerpoq. Qaammatillu arlallit isumaliutigereerlugu imigassamik ajornartorsiuteqarsimasut allat marluk peqatigalugit aallartitsivoq. Aappaa Vejlemit aappaalu Kertemindemit AA-rtitsinermut peqataajartorlutik Odenseliartarput.     

AAMMA ATUARUK Danmarkimi kalaallinut ajornartorsiortunut kommunit ikiuutissaat assigiinngeqisut

Kalaallit Illuutaata neqeroorut nutaaq ilassilluarpaa

Kalaallit Illuutaat Odensemiittoq Region Syddanmark tamakkerlugu sullissisuuvoq. Kalaallit Illuutaat kommunini sullissisunut, nakorsanut pisortallu sullissiviinut ilaatigut innersuussisarpoq.

Kalaallit Odensemi Illutaanni pisortap Kirsten Mærskip KNR-imut oqaatigaa ikorfartoqatigiit Kalaallit Illuutaannit ilisimaneqartut aammalu aallartitsisut oqaloqatigineqarsimasut. Taakkununngalu innersuussisarusullutik oqaatigaa.

- Ilisimasakka naapertorlugit kalaallit oqaasii atorlugit Fynimi ikorfartoqatigiinnik peqanngilaq, immaqa aamma nunap sinnerani. Kalaallilli Illutaat namminneq piumassutsiminnik sulisut aqqutigalugit inuit kiserliortut allatigullu pisariaqartitsisut oqaloqateqarnissaannik aamma neqerooruteqartarpoq.

- Oqaatsit marluiit atorlugit ikorfartoqatigiiffiliortoqarnera isumassarsiatsialaavoq, aamma innuttaasut namminneerlutik taamatut pilersitsinerat pitsaasutut isigaara, Kirsten Mærsk taama oqarpoq.

Akvilas Lundbladip ikorfartoqatigiit inuit attaveqaqatigiittarfiisiguinnaq maannamut nittarsaassimavai, ilaatigut kalaallit Danmarkimiittut Facebookimi attaveqaqatigiittarfiisigut. Aamma Kalaallit Odensemi Illuutaanni allagarsiisarpoq.

- Oqaatsivut atorlugit ikorfartoqatigiiffimmik amigaateqartoqarnera malunnarpoq, arlallit tulliani takkukkumallutik oqaatigaat, neqeroorullu nutaaq iluarisimaarneqarpoq, Akvilas Lundblad KNR-imut taama oqarpoq.

Ikorfartoqatigiit arfininngorpat decembarip 19-iani nal. 10 naapissapput, Overgade 41-mi, Odense C.

Kikkulluunniit tikilluaqqusaapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat