Kalaallit atisanik ilusilersuisartut Københavnimi
Qaqqat sannaannik, Kalaallit kuanniusaannit, qaannanik, pusillu sannaanik allallersukkanik kjoleliat tassaapput ilaatigut Isaksen Designip aasanerani saqqummersitassai ulluni makkunani Copenhagen Fashion Weekimi takuneqarsinnaasussat. Saqqummersitsinerlu iluatsillugu Isaksen Design tuluit nunaanni niuersinnaalernissamik angusaqarusuppoq.
- Saqqummersitsinerni kingullerni marlunni peqataaffigisatsinni malugisimavarput tuluit nunaannit Irlandimiillu soqutiginninneq annertusiartuinnartoq. Maannalu saqqummersitsinermi tulummik tuniniaaqqissinnaasumik ilaqarpugut, neriuppugullu pisisartut tuluit nunaanninngaannersut eqqartueqatigalugit isumaqatigiissusioqatigiumaarlutigit. Tamatumalu aamma saniatigut aamma norskit hollandimiullu saqqummersitsinermi tamani pisisartorisagut amerleriarsinnaanerat neriutigaarput, Isaksen Design taama oqarpoq.
Atisaliat nutaat modelinit takutsinneqassanngillat. Isaksenikkulli nammineerlutik pisisartutik qanimut oqaloqatiginerminni atisat takutissuutissavaat. Atisanik mutinik saqqummersitsinermi Isaksen Design 13-nissaanik peqataavoq. Saqqummersitsinermilu peqataasup kalaaliusup aappa Bibi Chemnitz pisiniarfiutitaaminik nittarsaasserusulluni peqataavoq. Pisinniarfinimi Århusimiittoq matusimavaa, maannalu Københavnimi pisinniarfissaa sapaatip akunnera tulleq ammartussanngorpoq.
-Kjoliliat nutaat, tujuuluit nasartallit, atisallu allalersukkat takutsinneqarput. Saqqummersitsisunilu peqataanera Tysklandimi pisisartoqarnernut allisaataassasoq neriuutigaara, Bibi Chemnitz oqarpoq.
