Kalaallit assammik arsartartut VM-imut pakatsisut: Aningaasat ajugaapput
TAAK-mi pakatsineq malunnarluarpoq nunarsuaq tamakkerlugu assammik arsartartut kattuffissuat IFH aalajangereersoq anngunniunnertaqanngitsumik USA VM-imut anngutillugu
Tassami kalaallit VM-imut peqataassanngillat inissaq pissallugu ilimagilluinarsimasaraluat USA-mut tunniunneqarmat.
AAMMA ATUARUK Assammik arsarnermi VM-mut kalaallit peqataassanngillat
- Aalajangerneq taanna isumaqatiginngitsorujussuuarput pakatsissutigalugulu, TAAK-mi siulittaasoq Jørgen Isak Olsen KNR-mut oqarpoq.
Nunarsuup immikkoortua kalaallit peqataaffigisaat VM-imut inissamik ataatsimik pissarsinikuuvoq. Anngunniunnissaq pilersaarutaagaluarpoq, coronali pissutigalugu tamanna pisinnaanani. Suliaq sivitsuloorunneqartoq allaffissornikkut IHF-imi aalajangiiffigineqarpoq.
USA artunngilarput
- Kattuffitsinnut NACHC-imut aamma nunarsuaq tamakkerlugu kattuffimmut IHF-imut naammagittaalliuteqarniarpugut. Tassani erseqqissarniarparput aalajangerneq isumaqatiginngilluinnaripput, Jørgen Isak Olsen oqarpoq.
Assammik arsartarnerup sapinngisamik amerlasuunut siammarterniarnera IHF-ip tunngavilersuutigalugu USA VM-imut anngutsinneqarpoq. IHF-imiit naliliipput VM-imut peqataanerup malitsigisaanik USA 300 millionit sinnerlugit innuttaqarmat assammik arsarneq soqutigineqarnerulissasoq.
- Aalajangiineq aningaasaqassuseq toqqammavigalugu pivoq timersorneq aallaavigalugu tunngavilersorneqarani. Nalunngilarput USA assammik arsarnermi kalaallinit appasinnerusumiittoq. Nunat tamalaat unammisarnerini tamanna takusinnaavarput, Jørgen Isak Olsen oqarpoq.
- Akerliulluta allagaqarnerput IHF-ip aalajangerneranik allannguisinnaagunanngilaq. Kisianni tamanut erseqqissarusupparput USAp VM-imut anngutsinneqarneranut tunngavilersuutit tungitsinniit naammagineqanngilluinnartut, Jørgen Isak Olsen oqarpoq.
USA 2001-miilli VM-imut peqataanikuunngilaq taamanerniillu panamerikamiut unammersuartarneranni kalaallinit appasinnerusarlutik.
Kalaallit 2007-mili VM-ip naggataarneqarnerani peqataanikuunngillat.
