Assammik arsarnermi VM-mut kalaallit peqataassanngillat

Assammik arsarnermi nunarsuaq tamakkerlugu kattuffik IHF aalajangerpoq USA VM-mut peqataatinneqassasoq

Tamatuma kingunerisaanik kalaallit Egyptenimi VM-rtoqarnissaani peqataassanngillat.

VM-mi inissaq USA-mut tunniunneqarpoq naak kalaallit inissaq taanna perusulluinnaraluaraat, NACHC-mi unammersuarnermut ataatsimiititaliaq ilisimatitsivoq.

Sapinngisamik inunnut amerlasuut assammik arsartarnerup siammarternissaa aalajangiisuuvoq Amerikap avannaamiut Caribiamiullu VM-mut peqataasussaannik toqqaasoqarmat.Nunarsuarmi assammik arsartartut kattuffiata suliniut new market project siornaassuaq aallartippaa. Tassani anguniarneqarpoq assammik arsarnerup sapinngisamik amerlasuunut siammarternissaa.

IHF naliliivoq USA VM-mut peqataanerup kingunerisaanik 300 millionit sinnerlugit innuttaqarami assammik arsartartunik amerlanerusunik pissarsinissaminut periarfissaqarnerusoq.

NACHC-mit siunnersuutigineqaraluarpoq kingullermik panamerikamiut unammersuarmata inissilluarnerpaat VM-mut peqataasussanngortinneqassasut.

IHF-mili aalajangerniarnermut kingullerik panamerican games tunngavigineqarpoq. Unammersuarnerit taakku tassaapput 2024-mi OL-qarnissaanut anngunniunnerit. Tassanili kalaallit peqataasinnaanngillat.

Assammik arsarnermi VM januarip 13-at 2021-mi aallartissaaq.

NACHC-miit VM-mut peqataasussat anngunniunnertaqanngitsumik toqqarneqarput. Coronap tuniluunnera pissutigalugu anngunniulluni unammisitseriaraluarnerit arlallit iluatsinngitsoorput.