Kalaallit arnat Redenimik atuisut amerlisimapput
Ornittakkap Redenip Københavnimiittup 2013-ip ingerlanerani kalaallit arnat assigiinngitsut 86-it nalunaarsorsimavai, taakkulu ornittakkamik atuisut tamarmiusut 35 procenteralugit.
- Kalaallit arnat Redenimukartartut maannakkorpiaq amerlasuupilussuupput, ukiullu affaani kingullermi taamaappoq. Ilarpassui angerlarsimaffeqanngitsuupput, Redenilu unnuisarfittut, neriartortarfittut kiisalu sulisunik oqaloqateqarnissamut atortarpaat, Redenip pisortaa Karen Reiff oqaluttuarpoq.
Kalaallit arnat Redenimik atuisorpassuarnut allanut naleqqiullugit atortittartuunatillu ikiaroornartumik sakkortuumik atornerluisuunngillat.
- Tassaanerupput arnat imigassamik hashimillu atornerluinermik ajornartorsiuteqartut. Kalaallit arnat ikiaroornartumik sakkortuumik atornerluisuusunik naammattuuerpiarneq ajorpugut.
Arnat kalaallit atuisut amerleriarnerat pissutigalugu Redenip Københavnimiittut arnat taakku akornanni misissuisitsinermik aallartitsisimavoq.
- Kalaallit kulturiannik inuiaqatigiinnillu paasinnittaasaannik ilisimasakippallaarluta paasisimavarput. Taamaammat misissuineq aallartikkatsigu Kalaallit Illuutaat attaveqarfigaarput ilisimanik tamakkuninnga ikioqqulluta.
Suleqatigiilernerup malitsigisaanik ilaatigut inunnik isumaginninnermik suliaqartoq Kalaallit Illuutaanneersoq sapaatit akunneranut ataasiarluni Redenimukartarpoq Redenillu inunnik isumaginninnermi siunnersortit Kalaallit Illuutaanniittut aamma ikiortigisinnaavaat.
Kalaallit Redenimik atuisut amerlisimanerinut suna pissutaanersoq Karen Reiffip nassuiaatissaqartinngilaa, Kalaallit Illuutaasali 2012-ip ingerlanerani kalaallit Danmarkimiittut akornanni ikiortariallit amerliartornerannik misilittagaannut tamanna assinguvoq. Danmarkimi inuuneq pillugu pitsaanerusumik paasititsiniaasoqarnissaa kaammattuutigalugu Kalaallit Illuutaat Naalakkersuisunut ukioq manna allagaqarsimapput.
