Kalaallisuunik nutarterisarneq pillugu oqallinneq

Kalaallisuut misigissutsinik attuisinnaasaqimmata oqallisissaqqissuusoq, Rosannguaq Rossen, kalaallisuugut pillugit 
ph.d.-liortoq naliliivoq.

- Oqaluuserineqassaaq kalaallit kulturianinngaanniit ilisarnaatit nutaaliornermi atorneqartarnerat qanoq sunniuteqartarnersoq, taavalu takku sunniutit qisuariaatillu qanoq assigiinngitsigisarneri eqqartorneqassapput, kiisalu killissaqaruni taanna nutaaliortarneq sumut killissava, Rosannguaq Rossen atisaliorneq kalaallisuugullu pillugit ph.d.-liortoq taama oqarpoq.

Saaqummersitsinermi atisaliortoq Jørgen Simonsen, arnat peqatigiiffianni siulittaasoq, Uthilie Heilmann,  Nunattalu Katersugaasivianeersoq Aviaaja Rosing Jakobsen, oqallinnermi peqataassapput.

Kalaallisuummi oqallisigineqaleraangata aalassattoqartaqaaq.

Soorlu atisaliortoq Peter Jensenip kimmikkaat kalaallisuut kamiinik isumassarsivigineqaqisut 2009-mi saqqummiummagit Nuummi akerliussutsimik takutitsisoqarpoq.

Misigissutsillu aallaavigalugit qisuariaateqartarneq sooq pisarnersoq Rosannguaq Rossenip ima nalilerpaa:

- Qisuariaatit amerlasuut kulturimik innarliinerarlugu, nutarterisoq taamaasioqqunagu. Tassunga pissutaanerpaagunarpoq kulturi minguitsikkusullugu, soorlu assersuutigalugu kalaallit kulturiat avataaninngaanniit innarlerneqarnissaa illersorumallugu taamatut qisuariartoqartartoq ilimagivara, Rosannguaq Rossen taama oqarpoq, nangillunilu:

 - Illersuerusussuseq pigerpasittarpaat, soorlu inerteripallallutik taamaasioqqusinatik pissutigalugu arlaat nutaaliorlutik atugartik taanna kulturiminngaanniit tammarnissaanik ernumallutik qisuariaateqartarput soorlu kamallutik, aliatsallutik imaluunniit misigalutik tusarnaarneqaratik ataqqineqaratillu,  Rosannguaq Rossen KNR-imut oqarpoq.

Oqallinneq ataasinngorpat januaarip ulluisa 23-anni Katuami unnukkut nalunaaqutaq arfineq-marlunut ingerlanneqassaaq.