Kalaallisut saqqummiunneqannginnera kinguarsaataavoq

Ataatsimiititalami siulittaasunngoqqammersoq Kalistat Lund, Siumumeersoq, ima oqarpoq:

- Kikkulluunniit tamarmik peqataaffigisinnaasaannik oqallinnissarput pingaartissimavarput, taamaattumik aamma eqqartorniakkap Angallannermut Ataatsimiititaliamit misissorluarsimanissaa pisariaqartinneqarpoq, tamannalu aatsaat pisinnaavoq kalaallisut saqqummerpat atuarluarneqareerpallu. Taamaammat tamanna patsisaavoq kinguartittariaqarsimaneranut, Siumut sinnerlugu Kommune Kujallermi kommunalbestyrelsimi ilaasortaq Kalistat Lund oqarpoq.

Angallannermut Isumalioqatigiissitap isumaliutissiissutaani pingaarnertut inerneri ukioq manna apriilip aallaqqaataani saqqummiunneqarput, isumaliutissiissutip eqikkarnera kisimi kalaallisut saqqummersinneqarluni.

Nutsigassap ilaatigut ajornakusoorsimanera pissutaaqataasoq, Angallannermut naalakkersuisup Jens B. Frederiksenip oqaatigaa:

- Nutserinerup naammassineqanngitsoornera soorunami ajuusaarnarpoq, kisianni suliassaq annertunerusimavoq, oqaatsit teknikkimut tunngasut amerlasimammata, taamaammat nutserineq imaannaanngitsorujussuusimavoq, Angallanermut naalakkersuisoq Jens B. Frederiksen oqarpoq.

Kalistat Lund nangilluni oqarpoq:

- Angallannermut tunngassuteqartut inuiaqatigiit kalaallit ineriartorneranni pingaarutilerujussuupput. Taamaammat inuit oqartussaaqataanerat  isigalugu Kommune Kujallermi Angallannermut Ataatsimiititaliamiit assorujussuaq ajuusaarutigineqarpoq isumaliutissiissut kalaallisut ilitsoqqussaralugu oqaatsit atorlugit suli saqqummersinneqanngimmat, Kalistat Lund oqarpoq.

Isumalioqatigiissitap isumaliutissiissutaa apriilip aallaqqaataani saqqummiunneqarnissaa qangalili pilersaarutaasimasoq, Jens B. Frederiksenip oqaatigaa.

Inatsisartulli ukiaanerani ataatsimiinnissaat eqqarsaatigalugu apriilip aallaqqaataani saqqummiisoqartoq, Jens B. Frederiksenip oqaatigaa:

- Inatsisartut ukiaanerani ataatsimiinnissaannut siunnersuusiussagutta, aningaasanullu inatsisissamut aappaagumoortumut tunngassuteqassappat, taava pingaaruteqarluinnarpoq piffissat eqqortut atussallugit, Ineqarnermut, Attaveqarnermut Angallannermullu naalakkersuisoq Jens B. Frederiksen oqarpoq.