Kalaallisut ilitsoqqussaralugit oqaatsinik atuartitsineq Aalborgimi iluatsilluartoq
Aalborgip Kommuniata kalaallisut ilitsoqqussaralugit oqaatsinik atuartitsinermik neqeroorutaanik atuartut 25-t missaat ukiup atuarfiusup 2016-17-ip aallartinneraniilli atuisuupput. Taamatullu amerlassuseqartillugit eqimattanut marlunnut avinneqarsimapput sapaatillu akunnerannut pingasoriarluni atuartitsisoqartarpoq.
Danmarkilu tamakkerlugu eqqarsaatigissagaanni tamanna immikkuullarissuuvoq, Københavnimmi, Aarhusip, Odensep Esbjergillu Kommuniini kalaallisut ilitsoqqusaralugit oqaatsinik ullumikkut atuartitsisoqanngilaq.
AAMMA ATUARUK Kalaallisut ilitsoqqussaralugu oqaatsinik atuartitsineq Danmarkimi amigaataasoq
Atuartitsineq Peqatigiiffiup Kalaallit Meerartaasa aamma Trekanten Bibliotek og Kulturhusip suleqatigiissutigaat, tamannalu aalajangiisuulluinnartuusoq Aalborgip Kommuniani Atuarfeqarnermut ingerlatsivimmi perorsaaneq pillugu siunnersorti, Indira Karamehmedovic, KNR-imut taama oqarpoq.
- Takusinnaavarput Peqatigiiffiup Kalaallit Meerartaasa meeqqat ilaqutariillu ataatsimut isigalugu qanittuararsuugaat. Aamma atuarfimmut tunngatillugu nalinginnaasumik attaveqarnermut naleqqiullugu annertuneruvoq.
Ornigulluni suliaqarneq angajoqqaanullu neqeroorutit
Danmarkimi kommunini allani pissutsit akerlianik Aalborgimi kalaallisut ilitsoqqussaralugit oqaatsinik atuartitsineq ukiorpassuarni ingerlanneqarsimavoq. Kalaallisulli atuartitsisoq soraarninngormat atuartitsinermut nalunaartartut ukiualuit matuma siorna ikileriarsimapput. Tamannalu pissutigalugu Peqatigiiffiup Kalaallit Meerartaasa kommuni aamma illu kulturileriffik Trekanten Aalborg Østimiittoq attaveqarfigaat.
Illuatungeriillu isumaqatigiipput ilitsoqqussaralugit oqaatsinik atuartinneqarnissamut pisinnaatitaaffiup kommunip nittartagaatigut ilisimatitsissutigineqarnerata saniatigut, Aalborg Østimi atuarfinnut pingasunut kalaallinit atuartuuteqarnerusunut ornigulluni suliniuteqartoqassasoq.
AAMMA ATUARUK Ilitsoqqussaralugu oqaatsinik atuartitsineq misissorneqalersoq
Tamatumunngalu peqatigitillugu illuatungeriit aalajangerput atuartitsineq Mellervangsskolenimit illumut kulturileriffimmut Trekantenimut nuunneqassasoq, tassani ilaatigut atuakkanik atorniartarfeqarmat, ininik sammisassaqartitsiveqarluni allanillu pulaartoqartarluni. Meeqqat taamaalillutik ulloq naallugu atuareernermik kingorna avatangiisini atuarfimmut eqqaanarpallaanngitsumi ornitassaqalerput.
- Toqqagassaammat atuartitsinerup pilerinarsarnissaa pingaaruteqarpoq, suliniuteqarnermi siunnersorti Jeppe Bülow Sørensen, Peqatigiiffik Kalaallit Meerartaanneersoq taama oqarpoq.
SMS-ikkut facebookkikkullu eqqaasitsisartut
Trekantenimi meeqqat ualikkut nerisarput angajoqqaallu kaffillerfigineqartarlutik. Angajoqqaallu immikkut suliniuteqarfiginerat pissutigalugu atuartitsinermut nalunaartut amerlisimapput, Indira Karamehmedovic Aalborgimi Atuarfeqarnermut ingerlatsivimmeersoq taama isumaqarpoq.
- Angajoqqaat kalaaleqatiminnik naapitaqarnissamut periarfissaqalernertik kajungerigaat paasivarput. Aamma Trekantenimi sammisassaqartitsinernut assigiinngitsunut, inuttut ilaqutariinnermilu pissutsit pissutigalugit pisariaqartinneqarsorisanut peqataasinnaaneq aamma pissutaaqataagunarpoq.
Atuartitsinerit kingorna atuartitsinermi meeqqat sunik sammisaqarsimanersut facebookkimi quppernermi matoqqasumi angajoqqaaat takusinnaasarpaat.
Takkuttartut amerlassusaat nikerartut
Kalaallisut atuartitsinermik eqimattat marluusut iluatsittutut oqaatigineqaraluartut aamma kisiannertaqarpoq.
Angajoqqaammi ullormi atuartitsiffiusussami sms-ikkut eqqaasinneqartaraluartut atuartitsinermut takkuttartut amerlassusaat nikerarput. Tamannalu kalaallisut atuartitsinermut atuutiinnarani aamma oqaatsinik allanik atuartitsinermut atuuppoq, Indira Karamehmedovic taama oqaluttuarpoq.
AAMMA ATUARUK Kalaallit meerartaat Danmarkimiittut oqimaattorsiortut
Ilaqutariit arlallit Danmarkimut nuunnermik kingorna sorlaqanngitsutut misigisimasarnerat ilaatigut pissutaatinneqarpoq.
- Nunaminnut utiinnanngikkunik illoqarfimmut allamut nuuttarput allamillu suliffittaarlutik. Tamakku ilaatigut pissutaasarput. Aamma ilaqutariit piffissap ilaatigut ataqatigiissitsisinnaasanngillat ilitsoqqussaralugit oqaatsinik atuartitsineq meeqqat atuarfimmi skemaat nalinginnaasoq malillugu aaqqissuunneqartarmat, Indira Karamehmedovic oqarpoq.
Kalaallisut ilitsoqqussaralugit oqaatsinik atuartitsinermut ukioq manna decembarimi peqataanissamut nalunaartoqaqqippat ingerlaannarnissaa Aalborgip Kommuniata, Peqatigiiffiup Kalaallit Meerartaat Trekantenillu naatsorsuutiginerarpaat.