Inuit 39-t lastbiilimi toqungasut Vietnamimiuupput: Vietnamiliaanneqartussanngorput
Inuit 39-t lastbiilimi toqungasut Londonip kangiani Esseximi oktobarip ulluisa 23-anni nassaarineqartut tamarmik ungasinngitsukkut Vietnamiliaanneqassapput.
Vietnamip Londonimi aallartitaqarfianit tallimanngormat taama nalunaaruteqarput.
Toqungasut nassaarineqartut tamarmik Vietnamimi innuttaasuusut, Vietnamimi oqartussat paasissutissiissutigaat.
AAMMA ATUARUK Inuit 39-t lastbiilini toqungasut pillugit tigusarinneqqittoqartoq
Vietnamip ministeriunerata Nguyen Xuan Phucip toqusimasut ilaqutaannut misiginneqataalluni nalunaarutigereerpaa. Tamannalu ilutigalugu Vietnamimi oqartussat inunnik anngiorluni eqqussuinermut akiuunnertik annertusarpaat.
Hanoimi tusagassiuutit naapertorlugit Vietnamimi ilaqutariit 25-t ilaquttaminnut maqaasineqartunut paasiniaallutik oqartussanut attaveqareerput.
AAMMA ATUARUK Toqungasut timaat 39-t Esseximi lastbiilimi containerimik usilimmi nassaarineqartut
Arnat arfineq-pingasut angutillu 31-t toqungasut Esseximi Graysimi qamutini kalittakkani containerimi oktobarip ulluisa 23-anni nassaarineqarput.
Toqungasut Vietnamimi nunap immikkoortuini assigiinngitsuni arfinilinneersuupput.
Irland Avannarlermiu 25-nik ukiulik suliami unnerluutigineqarpoq. Angutit marluk qatanngutigiit Irland Avannarlermeersut suliamut atatillugu ujaarineqarput.
