Toqungasut timaat 39-t Esseximi lastbiilimi containerimik usilimmi nassaarineqartut

Toqungasut timaat 39-t Esseximi lastbiilimi containerimik usilimmi nassaarineqareersullu Tuluit Nunaanni politiit toqutsisimasoqarneranik paasiniaalluni suliamik annertuumik aallartitsipput. 

Lastbiili Bulgariameersuuvoq, taannalu Londonip kangiani tassa Graysimi suliffissuaqarfeqarfiusumi nassaarineqarpoq. 

Paasissutissat saqqummiunneqartut siulliit naapertorlugit inersimasut 38-it inuusuttuararlu ataaseq toqutaasimapput. 

Lastbiilimi aquttoq angut 25-nik ukiulik tigusarineqartoq Nordirlandimeersuusoq tuluit aviisiat The Sun allaaserisaqarpoq. Angut taanna toqutsisimasutut pasineqarpoq.

Toqungasut timaat nassaarineqartut Graysimi suliffissuaqarfeqarfiusumi toqusimasutut nalunaarutigineqarsimasut nalunaarummi allassimavoq.

Toqutsisoqarsimaneranik paasiniaaleruttornermut tunngatillugu Tuluit Nunaanni toqutsisimasoqarneranik paasiniaalluni suliamik aatsaat taama annertutigisumik ingerlatsisoqarpoq.

Toqungasut timaannik kinaassusersiniaaneq aallartereersoq

Lastbiilip nassaarineqareernerata kingorna ambulancenik pingasunngornermi ullaassakkut nal. 01.40 sianerluni aggersaasoqarsimasoq oqartussaasut oqaatigaat.

- Timit toqungasut kinaassusernissaannut paasiniaaleruttorpugut, politiit pisortaanerat Andrew Mariner oqarpoq.

- Ilimagaara tamatumani misissuinerput sivisujumaartoq, Andrew Mariner oqarpoq nangillunilu:

- Lastbiiili Bulgariameersuussangatillutigullu Holyheadimut arfininngormat tikissimassangatipparput. Suleqativut paasiniaanitsinni qanimut suleqatigaavut.

Esseximi politiit Twitterikkut ima allapput: "Inunnik anngiorluni eqqussuineq amiilaarnartuliornerullunilu navianartuliorneruvoq. Paasianiaalluta suliarput una annertuvoq".

Kiinamiut toqungasut timaat 58-it illoqarfimmi umiarsualiveqarfeqarfiusumi Doverimi Londonip kujasissuaniittumi lastbiilimi tomatinik usilimmi akitsuuserisunit 2000-mi nassaarineqarmata inunnik anngiortumik eqqussuinermut tunngatillugu Tuluit Nunaanni suliani alianartuni annerpaavoq.