Kalaallip ilorpiaaniit erinarsuutit pillugit atuagaq nutaaq saqqummerpoq

Kalaallit Nunaannut tikeraarnerminni naammasseqqammersumi kunngi Frederik dronning Marylu atuagaq "Nuna asiilasooq" tunissutisiaraat. 

Kalaallit erinarsuutaannik 21-inik meeqqanut guitarernermut qaammaasaqalersitsisoq atuagaq 1.500-nngorluni naqinneqartoq saqqummerpoq.

-Kalaallit erinarsuutaannik nutaannginnerusunik tunngaveqarluni meeqqat sisamat tallimallu missaani ukiullit klassiskimik guitareriaatsimut qaammaasaqaleernerunissaat siunertaavoq. Erinarsuutit taaneqarsinnaallutik kalaallip nipilersornikkut ilorpiaaniitsitaat, taama oqarpoq John Hansen 2009-miilli suliniummik Nuna asiilasuumik taasaminnik suliaqartoq.  

Erinarsuutit 21-iusut atuakkami marlunnut avinneqarput: Taallanut immikkoortoq kalaallisuuniit tuluttuunut Kuupik Kleistimit nutserneqartut, kiisalu nuutinik immikkoortoq, tassani Kaare Norgemit aaqqissorneqartut patiffinnullu nalunaarsuiffik Bo Swahnimit suliarineqartut. John Hansenip suliniut isumassarsiaraa piviusunngortillugulu.

Erinarsuutit assigiinngitsutigut toqqartorneqarput:

-Atuakkiorfimmiit erinarsuutit qupperarlugit illoqarfiit aqqi qimerluualaarpakka, tassami erinarsuutit ilaat illoqarfinnut sumiiffinnullu attuumassuteqarput. Kisiannili tassa qulit, aqqanillit, aqqaneq-marluk pinngitsuunngiivillutik ilanngunneqartariaqartut toqqarpakka. Soorlu Nuna asiilasooq, nunarput (utoqqarsuanngoravit), panna qilassuaq, seqernup qungujulluni, ukiap seqerna pukkilisoq, ammassalik pinnarisara; pingaaruteqartut John Hansen oqarpoq.   

Nuna asiilasooq, Kalaallit Nunaata inuiattut erinarsuutaata aappa innuttaasunut itisuumik misigititsisarpoq. Taamatuttaaq aamma sunniuteqartarpoq Avgo Lyngep erinarsuusiaa, Nunaga aa, nunarsuaap avannaani , Aqqaluk Lyngep Per Kirkebyllu 1972-imi piviusulersaarutaanni "Naalakkersuisut oqarput, tassagooq" qullissarmiut pigisaminnik assartuereerlutik nunagisaminnik naggataasumik aallalernerannut qullisarmiut erinarsugaat nipitut atorneqarpoq. Camilla Nielsen ilaatigut atuakkami qalipakkanik assitalersuivoq.

Nutserinerit

Taallat kalaallisuumiit tuluttuunngortinneqarnerat Kuupik Kleistip suliarai.  

- Soorlu Johni oqartoq, oqaatsit taallani atorneqartut nutsersinnaajumallugit, pisariaqarpoq oqaatigineqartut iternga tikillugu paasissallugit Kuupik Kleist oqaluttuarpoq. 

- Oqaatsimiit oqaatsimut nutserisoqaannarsinnaanngilaq, kisiannili oqaatiginiarneqartut nutserneqartariaqarlutik.

Kalaallisut tuluttullu saqqummersinneqarneranut patsisaavoq naqiterinermi aningaasartuutaasut amerlavallaannginnissaat. Siunissamulli eqqarsaataavortaaq aamma atuakkap danskisuunngortinnissaa, taamaalilluni Nuna asiilasooq danskit meeqqanut atuarfianni ilinniutinut ilanngunneqarsinnaassammat.