Kalaallinut inuuniarnikkut ajornartorsiuteqartunut aningaasat amerlanerusut
![](/sites/default/files/styles/image_934x467/public/article_images/det_groenlandske_hus_aarhus_streetview.png?itok=rxt0zIEu)
Danmarkimi aningasat tapiissutaasartut satspuljemidlit ilaat kalaallinut inuuniarnikkut ajornartorsiuteqartunut Kalaallit Danmarkimi illuutaat aqqutigalugit atorneqassapput.
Danmarkimi naalakkersuisut inuiaat ataatsimoortut ilaanni ajornartorsiuteqartunut aningaasaliissutiginiakkami pilersaarutaanni tamanna atuarneqarsinnaavoq.
Kalaallit Danmarkimi Illuutaannut tamanna nuannaalersitsivoq.
Kalaallimmi illuutaasa neqeroorutaasa ilaat aappaagumut killeqarput, assersuutigalugu inuiaqatigiinnut akuunerulersitsiniarnermut tapiissutaasartut killeqarlutik. Katillugit 8 millionit koruunit matumani pineqarput, kalaallit Danmarkimi illuutaasa suliniutinut assigiinngitsunut atugassaannut aningaasaliissutaallutik, kalaallit Danmarkimut nooqqammersut sapinngisamik ajunnginnerpaamik inuuneqalersinnaanissaat pillugu suliniutinut atorneqartarlutik.
- Inuiaqatigiinnut akuunerulersitsinissamut suliniutinut aningaasaliissutigineqartartut sivitsorneqarnerat pissutaalluni assersuutigalugu psykologimukarsinnaanissamut aningaasaliissutit, sullissisullu Viborgimi Randersimilu ornigullutik sullissisinnaanissaat nanginneqarsinnaassaaq, Kalaallit Aarhusimi Illuutaanni pisortaq Jørn Holbech KNR-imut oqarpoq.
Kalaallit Danmarkimi Illuutaannut tapiissutit saniatigut Namminersorlutik Oqartussat isumaginninnikkut suliaannut tapiissuteqarsinnaanissaq, Danmarkimi naalakkersuisut siunniuppaat.
Satspulenut aningaasaliissutit aappaagu 1 milliardit koruunit missaanniipput. Isumaqatiginninniarnissat oktobarip naajartulernerani aallartissapput. Atlantikullu avannaani ilaasortat isumaqatiginninniarnissanut qaaqqusaanngillat.