Kalaaliaqqami eqaluit uumasut
Qinigaaffiimi kingullermi Marius Olsen Sisimiuni kommunimi politikkeriuvoq, tassanilu Norgemut paasisassarsiornermi takusani aallaavigalugit Kalaaliaqqami aalisakkanik uumasunik tuniniaasalernissaq misilikkusuummerpaa.
- Ukiualuit matuma siorna taamatut takusaqarpunga kisianni nunatsinni misilinnissaa isummanniittuarsimavoq, Marius Olsen oqarpoq.
Uani pineqarput eqaluit uumatillugit pisarisinnarlugit baaliarsuarmut imermik imalimmut ikillugit uumatinnissaat. Taamaasillugit Kalaaliaqqami tuniniarnissaat siunertaavoq. Isumassarsianilu aalajangiusimavaa aasaanerani eqaluit nutaarpassuit Kalaaliaqqami tuniniarneqartaraluartut.
- Eqqaamasariaqarparput aasami kiattumi aalisakkat asiujasuararsuusut - aamma ulloq taanna pisaasimagaluarunilluunniit, Marius Olsen KNR.gl-mut oqarpoq.
- Taamaammat uumatitsinikkut aalisagaq nutaajusussaavoq pisussamit tiguneqarnissami tungaanut, oqarpoq.
Taanna nammineerluni misileraasimavoq eqalunnik pisaminik uumatitsilluni. Iluatsissimavaa eqaluit nalunaaquttap akunnerini arfineq pingasuni illoqarfimmi uumatinnissaat
Suliniutip aallartisarnerani Qeqqata Kommuniata atuilluartuunissamik aningaasaateqarfiani aningaasaliiffigineqarpoq. Suliniutinut assigiinngitsunut aningaasat 100.000 koruunit ippassigami agguaanneqarpoq. Marius Olsenip suliniutaa baaliarsuarmik iltimillu silaannalersuummik pisinissamut 25.000 koruuninik tunineqarpoq.
- Aalisarneq pillugu nuisitsineq Sisimiuni qanittumi pivoq tassanilu atortussanik tuniniaasartut arlallit attaveqarfigilersimavakka. Suliniut aasamut eqalunniarneq juunip 15-at ammarpat aallartissavarput, Marius Olsen oqarpoq.
Suliniut misileraanertut ingerlassaaq. Aalisakkat nerpii innarlerneqassanngippata mianersuuteqqissaarlugit passutassaapput. Taamaammat pisarinissaat paaqqutarinissaallu atuisumut tuniniaasumullu ajunnginnerpaaq nassaariniarneqartussaavoq. Misileraaneq iluatsissappat periarfissanik nutaanik ammartoqariaannaavoq.
- Eqqarsaatigineqarsinnaavoq bundgarnersornermi saarulliit uumatillugit pisat taamatut aamma Kalaaliaqqami tuniniarneqarsinnaanerat. Misileraanerput illoqarfiit allat aamma ilinniarfigisinnaavaat taamalu aalisakkanik uumasunik tuniniaasarneq atugaanerulersinnaalluni, Marius Olsen oqarpoq.
