Kalaaleq sisorartartoq Italiami coronavirusimik tunillatsittoq

Nuunu Chemnitz Berthelsen inuuniutigalugu sisorartartuuvoq Italiallu avannaani najugaqarluni. Coronavirusimik tunillatsissimalluni paaseqqammerpaa.

Nuunu Chemnitz Berthelsen Italiap avannarpasissuani Brunicomi sisorartartoqatini tallimat peqatigalugit najugaqarpoq. Ukiullu kingulliit pingasut Italiami najugaqarluni ineqatinilu sangujorarnermik ataatarput, tassa alpinimik, ulluinnarsiutigalugulu sungiusartarlutik.

Maannali sungiusarsinnaanani igalaakkut itsuannisaaginnartariaqaleqqavoq, naak silaqqilluni sungiusarfissatsialaagaluartoq. 

Nuunu Chemnitz Berthelsen ullut marluk matuma siorna coronavirusimik tunillatsissimalluni nakorsamit paasivaa.

Sverigemi 2019-imi nunarsuarmi pissartanngorniunnermit. Sangusaarnermik pissartanngorniunnermi Nuunu Chemnitz Berthelsen 36-inngorpoq.

Sverigemi 2019-imi nunarsuarmi pissartanngorniunnermit. Sangusaarnermik pissartanngorniunnermi Nuunu Chemnitz Berthelsen 36-inngorpoq. Assi: Nammineq pigisaq.
 

- Sapaatip akunnera ataaseq napparsimavunga, isumaqarsimanngikkaluarpunga coronavirusiusoq. Nualluummimmi takussutissanik soqannginnama. Kissarneqanngilanga, quersunngilanga toqqusaakkalu annerinagit. Kakkilertaannarpunga nerisakkalu mamassuseeruteqqallutik. Aamma siuserinngilanga, Nuunu Chemnitz Berthelsen oqarpoq.

AAMMA ATUARUK Arctic Winter Games coronap ernumassutiginera pissutigalugu taamaatiinnarneqartoq

- Ajunngilanga pitsanngoriartorlungalu. Strepsilitorpunga, soorlu nalinginnaasumik nuakkaanni iluaqutaasartut atuinnarlugit.

Nuunu Chemnitz Berthelsen sisoraqatigisartakkanilu sungiusartarfimmi ungasinngisaanni akunnittarfimmi najugaqarput.

Paasisat: 
 

  • Italia Europami coronavirusimik tunillatsissimasuni siuttuuvoq.
  • 233-t toqupput. Italiami coronavirusimik toqquteqartut nunarsuaq tamakkerlugu amerlanerpaanit tullertut inissisimavoq.
  • Italiami oqartussat tuniluunneq pinngitsoortinniarlugu arfininngornerup unnuaani sukannersumik aqutsilerput.
  • Sukateriffigineqartut aaku:
  • Katersugaasiviit, isiginnaartitsisarfiit, filmertarfiit, atuarfiit, imerniartarfiit kasinollu apriilip pingajuata tungaanut matoqqatinneqassapput.
  • Italiap avannaata ilarujussuanut angallanneq matuneqarpoq
  • Lombardiet, illoqarfissuaq Milano najugaqarfiillu allat angalaffigeqqusaajunnaarput. Soorlu aamma Venedig, Venetop eqqaa illoqarfiillu Parma Riminilu pineqartut.
  • Inuit 15 millioninit ikinnerunngitsut aneqqusaajunnaaqqapput. Tassa Italiami najugallit sisamararterutaat.
  • Italiami najugallit angerlarsimaffimminiinngitsut nunaminnut angalasinnaasut nutaarsiassaqartitsivik Corriere della Sera allaaserisaqarpoq.
  • Imerniartarfiit nerianiartarfiillu ammaannarsinnaasut taakku aamma allaaseraat. Pisinialli meterimik ataatsimik ungasissuseqarnissaat piumasarineqarpoq.

Tusarfik: Ritzau

Akunnittarfimmi igasoqarput, taannalu coronavirusimik tunillatsissimasoq paasineqarmat akunnittarfimmi najugallit tamarmik tunillatsissimanersut misissorneqarput.

Nuunu Chemnitz Berthelsen misissorneqareernermi kingorna tassa paasivaa tunillatsissimasunut ilaalluni. Taannalu aaqqinnissami tungaanut akunnittarfimmi iniminit aneqqusaajunnaarallaqqavoq.

- Ininnut mattuteqqavunga, tamannalu akueriinnaqqavara iliuuseqarfiginerusinnaannginnakku.

Peqqissinissani naatsorsuutigaa

Nuunu Chemnitz Bertheleseni ernumanngilaq peqqisseqqinnissanilu naatsorsuutigalugu. Akunnittarfimmili arnat utoqqaat marluk najugaqatigaat, aappaa sukkortoq, taannalu isumakuluutiginerullugu oqarpoq.

- Uannut sisoraqatigisartannullu aarlerinngilluinnarpunga. Inuusuttuuvugummi peqqissuulluta, arnarli utoqqaq taanna isumakuluutigineruara. Nualluutillu sukkaannaq tuniluutipallannera aamma ernumanartoqartippara, sukkasuupilussuuvormi, sumut tamaanga qanittukkut siaruaatilissasoraara. Uagummi isumaqaraluarpugut maani soqanngitsoq tunillatsittoqarporli. Tunillaassuutilertoqaarmi.

Nuunu Chemnitz Berthelsen nakorsamit akuerineqartigani iniminit aneqqusaanngilaq. Atuarnermut nangeqattaartunillu isiginnaarnermut piffissaq atorini oqaluttuaraa.

- Atuarlungalu isiginnaaqattaarpunga. Aamma pississaallattaarama timera aalatilaarniaannarlugu

AAMMA ATUARUK Ataatsimiititaliarsuaq: 1000-imik amerlanerusut katersuunnissaat unitsillik kinguartillilluunniit

Nunatsinnut angerlarusukkaluarpoq, nualluummilli tunillaassuinissani aarlerinartillugu nunatsinnukarusugani.

- Tunillaassuisinnaatillunga Kalaallit Nunaannukarusunngilanga. Misissugarineqaqqaarusuppunga angerlarnissara aalajangiiffigitinnagu, Nuunu Chemnitz Berthelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat