Kalaaleq Norgemiittoq: Qanorluunniit qisuariassanerlunga naluara

Vivi Sørensen ilaavoq, Norgemilu tallimanngormat pisimasut tunngavigalugit taanna ima oqarpoq:

- Oslo ungasikkaluaqalutigu inuit nuanniillioqisut malunnarpoq. Qanorlunniit qisuariassanerlunga naluara, Vivi Sørensen oqarpoq.

Nunap inoqqaavi Canadameersut, Norgemeersut Nunatsinninngaanneersullu Norgep avannarpasinnerusortaani kulturikkut pikialaartitsinermut peqataapput. Torlorsortoqarpoq, isiginnaartotsisoqarlunilu, soorlu aamma atuakkianik saqqummersitsisoqarlunilu eqqumiitsulianik saqqummersitsisoqartoq.

Nunap inoqqaavi allat peqatigalugit Vivi Sørensen uaajeerpoq, inngertoqarlunilu,  kulturillu assigiinngitsut pillugit saniatigut workshopertitsisoqarluni.
Riddu Riddu sisamanngormat aallartippoq, Oslomili Utøyamilu tallimanngormat pisut pissutigalugit pilersaarutit allanngortinneqarlutik.

Inuit 4000-it isiginnaariarput, isiginnaartitsisartut eqqumiitsuliortullu 300-t missaanniittut Oslomi pisut pillugit eqqaaniaasoqarnissaa pillugu tusarnaartitsillutik.

Kalaaleq Christian Mølgaard, Riddu Riddumik aaqqissueqataavoq. Taanna Tromsømi ukiuni kingullerni pingasuni najugaqarpoq ilinniartuullunilu.
Taannattaaq Oslomi pisut alianaqisut pillugit ima oqarpoq:

- Oslomi pisut pissutigalugit sukkasuumik qisuariartoqarpoq, pilersaarutit allanngortinneqarlutik.Tusarnaartitsisussarpassuit uniinnarput, kisianni Riddu Riddumi peqataasut aperaakka tusarnaartitserusunnersut, akuersippullu. Kusanartorujussuarmik tusarnersumillu nuannersumillu tamarmik tusarnaartitsipput. Kisianni pisimasoq alianartoq malunnarpoq. Qanigisakka, maani nalunngisarilersimasakka aamma eqqorneqaramik, Christian Mølgaard oqarpoq.