Kalaaleq muay thaimi aningaasarsiutigalugu unammisartunngoriartulerpoq
Ateq Omar Salim immaqa kalaalerpaluppallaanngikkaluarpoq.
Inuttaali aperigaaanni kalaaliusutut misiginera paatsuugassaanngilaq. Imalu taama misigisimatigaa Thailandimiut timikkut attortarluni timersuutaanni muay thaimi atortuminut erfalasorput ikkuttarlugu.
Taannaannaanngilari. 18-nik ukiulik Omar Salim muay thaimi Danmarkimi pissartaavoq maannalu ulluni 45-ni kangianeeqqammivoq tassani aamma angusarissaartarluni.
- Sapaatit akunneri arfinillit Thailandimiikkama aningaasarsiutigalugu unamminerni marlunni unammivunga. Assut ingerlalluarpunga. Tamatigut ajugaavunga unammisakka ilisimajunnaartillugit, Omar Salim KNR-mut oqarpoq.
Eqqaaneqareersutut kalaallinik siuleqarpoq. Arnaa tunumiuuvoq angutaa Irakimiuulluni.
Kalaaliunini tulluusimaarutigaa
Taamaattumik unammiffimmut sassaraangami atortuminut erfalasorput ikkuttarpaa.
- Kalaaliunera assut tulluusimaarutigaara aamma sumiuunerat takutikkusuppara. Tassani apeqqutaanngilaq Danmarkimi imaluunniit Thailandimi namminersunga. Nunaga sinniisuuffigiuassavara. Taamaattumik erfalasutsinnik nassartuartarpunga kalaaliunera tulluusimaarutigeqigakku, Omar Salim Odensemi najugaqartoq oqarpoq.
Omar Salim tilluuttartutut aallartippoq maannalu muay thai allallu timikkut attortarluni timersuutit aallutaralugit. MMA-mi oktoberip aallartilaarneranni VM-qataassaaaq timersuullu taanna tassaavoq tilluisarluni, isimmitsisarluni tigusisarlunilu timersuutit akuleriisillugit unammeriaaseq.
Taamaattoq Omar Salim suli allanik anguniagaqarpoq.
- Timersuutiga inuussutissarsiutigilerusuppara siuariaateqarlunga pissartaanerit angusarlugit, Omar Salim oqarpoq.
Tamaanga killinnermini angunni iluaqutaasimanerarpaa sungiusartuarnissamut kaammattuisarmat.
Peqaatigiiffilli Odensemi tunuliaqutigisani Great Danes Club aammalu sungiusaasua Jimmy Busk inuttaata oqarnera malillugu ullumikkut taama kakkatsigineranut tunngaviliipput.
