Nunanit allanit

Kalaaleq Istanbulimiittoq qaartartumeeriffiup ungasinngisaaniissimavoq

Piitaq Samuelsen Kalaallit Nunaanneersoq tuluttut ilinniartitsisutut Istanbulimi atorfeqarluni maanna najugaqarpoq, mittarfillu qaartartumeeriffigineqartoq Piitaq Samuelsenip suliffiata ungasinngisaaniippoq.

Allattoq Bikki P. Kleist

juunip 29-at 2016 11:39

Tyrkiami Istanbulimi mittarfissuarmut saassussisoqareersorlu ullumikkut ulloq aliasuffiuvoq.

- Angerlamut apuukkama assorujussuaq tusagaq tussunngunarluni sakkortuvoq. Inuttullu nakeriallannarlunilu misigissutsit imaannaanngillat, Piitaq Samuelsen oqarpoq nangillunilu:
- Aliaqasoqaagut, tyrkiamiullu misigissusaat kalaallinut eqqarnartorujussuusaramik, tamatta misigissutsikkut attortissimaaqaagut.

Toqukkut qimaguttunut ikiligaasunullu maaniilluni misiginneqataanarpoq.

AAMMA ATUARUK Istanbulimi timmisartoqarfissuarmi qaartartumeerisoqarnerani 50-it missaat toqutaasut

Istanbulimi aqquserngit maanna inoqarpianngillat, suliffeqarfiillu arlallit matoqqallutillu inuit angerlarsimaannarnissaat kaammattuutigineqarmat, Piitaq Samuelsen tuluttut ilinniartitsisut atorfeqartoq suliartussanngikkallarluni oqarpoq

- Innuttaasut angerlarsimaannarnissaannut oqartussat peqqussuteqarnerisigut ulluni tulliuttuni suliartortoqassanngikkallarpoq.

Istanbul 14 millioninik innuttaqarpoq. Qaartartumeerisoqareersorlu politiit massakkut sakkortuumik sillimaniarlutik upalungaarsimaleruttortut, Piitaq Samuelsen oqaluttuarpoq:

- Upalungaarsimaniartoqarpoq, illoqarfimmilu politiit ullut tamaasa sillimaniarnikkut misissuillutik. Piitaq Samuelsen Istanbulimi siornali najugaqartoq KNR-mut oqaluttuarpoq.

Aamma atuaruk PISUT Istanbulimi timmisartoqarfissuarmi saassussineq pillugu ilisimasavut