Kalaaleq arnaq Tokyomi najugalik

-Ersinarpoq, nalullugu qanoq iliussanerluni susinnaanagulu, taavalu ilaquttannut ikinngutinnullu attaveqarsinnaananga, Kristina Hendriksen Japanip illoqarfiisa pingaarnersaanni Tokyomi nipilersornermik ilinniartoq oqarpoq.

Kristina Hendriksen oqaluttuarpoq nunap sajunnerani illup iluani naakkaasoqalersimasoq, matut igalaallu nammineq ammartitersimasut aamma qulliit qamingajattarlutik pisimasut.

Kristinap inissiami najugaqarfigisamini quleriit arfineq pingajuanni najugaqarpoq. Oqaluttuarporlu inigisaminit ungasiartumiittut ikuallannerini qatserisartut saneqquasut imaaginnavissimasut. Ilanngullugulu oqaatigaa nunap sajoqqilersinnaanissaanut ilimasaarisoqarsimasoq nalunaarfigineqarsimalluni.

-Kammalaatinnit Japanimiumit allagarsivunga nuna sajoqqilissappat inigisanniit ammukassasunga. Pukkinnerusumiikkuma iluarnerussammat.

Kristina Hendriksenip oqaatigaa tusagassiutinit nalunaarfigineqarsimallutik nerisassanik nerisariaannarnik imermillu piareersimatitsissallutik siunnersorneqarsimallutik, aamma qulliit qaminneqariaannaammata qaammartartumik piareersimasuuteqaqqusimagaatik.

Kristina Henriksen nunap sajunnerata kingorna ajoqusersimanngikkaluarluni assoroorsimaqaaq.

-Assoroorsimanermik nukikka tamarmik annernarput neriuppungalu Nunatsinnut ajornanga arlaanni angerlarumaarlunga, Kristina Hendriksen Japanimi ukiup tallimassaa najugaqartoq oqarpoq.

Joachim Jørgensen Japanimi ilisimatusartoq ullup qeqqanut radioaviiseqarnerani oqaatigaarput naatsorsuutigalugu oqaluttuartissinnaassallugu. Radioaviisimiillu oqaloqatiginerani paasivarput ajunngitsoq, najugaqarfigisaanilu Japanip kujataani nunap sajunnera sakkortuumik malugisimasimanngikkat. Tsunamimulli mianersoqqusinerit piareersimaffigalugit ikinngutini peqatigalugit qaqqamut portunerusumut ingerlaniartoq.