Kalaaleq aarsaartartoq Iceland Open-imi angusarissaartoq
Max Petersen Nuummi aarsaartartut unammeqataasartulllu ilaat Islandimi junip 17-aniit 21-iata tungaanut Iceland Open 2015 unammeqataavoq.
Nunanit tamalaanit unammeqataasut 20-viupput, tassaasut; Østrigimiit pingasut, Tysklandimiit pingasut, Kalaallit Nunaaniit ataaseq, Australiamiit marluk sinnerilu Islandimeersuullutik.
Ullut unammiffiusut siulliit marluk silarlunnera peqqutigalugu sila atoruminarsimanngilaq. Ullulli kingulliit pingasut atoruminarnerusimallutik.
Aarsaarnermi isorartussutsit uku unammissutigineqarput:
Ullut pingajuat: 27,7 km – ulloq taanna Max Petersenip angusaa 3 km-ri nr 16-nitut inissilluni
Ullut sisamaat: 21,2 km – ulloq taanna ulloq taanna Max Petersenip angusaa 15,6 km-ri nr 5-itut inissilluni.
Ullut tallimaat: 20,7 km – ulloq taanna Max Petersenip angusaa 19,61 km-ri nr 1-itut inissilluni.
Ullut pingasut unammereernermi katillugu inissinnera nr 2-nngorpoq.
Angusaq kusanartoq
Islandimi ullut unammiffiit isorartuallaanngikkaluartut Max Petersinip Europami unammisarnerminut sanilliullugu assigiinngitsutigut unammillernartoqarsimavoq. Tassa anori isersarneq silaannarlu qummukaasoq unammillernarsimallutik. Ullorortorlu isersarneq takkuttarpoq assorneralu apuuffissap sammivianiilluni. Silaannarlu assornera peqqutigalugu qummukaasartoq naapitassaajunnaartarluni .
Arsaartartup angusani tulluusimaarutigaa.
- Ulloq kingulleq unammeqatinnut sanilliullunga aarsaarluaqaanga. Apuuffissatsinnut 495 meteri amigaatigiinnarlugu isersarnerpallaarnera peqqutigalugu miinnartariaqarpunga. Apuussimasuuguma katinnerani tamarmik angusimassagaluarpakka. Kisianni 2-ngornera tulluusimaarutigeqaara, Tysklandimeersoq minillugu tamarluinnangajammimmi angungajakkakkit. Siornatigut Europami unammeqataasarnikka iluaqutigeqaakka, soorlu Europa meterskab-i Verdensmesterskab-i assigisaalu. Qujassutissaqarpunga Elite Sport Grønland-ip aningaasatigut tapersersuisarneranut. Taamaassimanngitsuuppat angusara aarsaartartutut tamaanga killissimassanngikkaluarpoq, Max Petersen tusagassiutinut allappoq.
Unamminerni inernerit assillu uani takuneqarsinnaapput.