50-ileereersimasut Omicronimut akiuussuserneqassapput
Covid-19-imut akiuussuserteqqinnissaq ullulerneqarpoq.
Covid-19-imut aamma nualluummut naliginnaasumut innuttaasut aalajangersimasut, oktobarip aallaqqaataanit akiuussuserteqqissinnaanissaat maanna neqeroorutaalerpoq.
Peqqissutsumut Naalakkersuisoqarfik tusagassiuutinut taama nalunaaruteqarpoq.
Kikkulli tamavimmik akiuussuserteqqinnissaat uani siunertaanngilaq. Siunertaasorli tassaalluni inuit 50-ileereersimasut aamma immikkut aarlerinartorsiortut.
- Naatsorsuutigaarput amerlasuut Corona-mik ukiaru tunillatsissasut, amerlanerpaalli sakkukitsumik napparsimasapput. Taamaattumik aalajangerpugut akiuussusersuinissamut neqeroorut inunnut perulunnartumik napparsimalersinnaasunut neqeroorutigineqassasoq, Nunatta nakorsaanera, Henrik L. Hansen tusagassiuutinut nalunaarummi oqarpoq.
Coronamut siusinnerusukkut akiuussusersuinermi atorneqartoq assigalugu maanna atugassaq illersuutitaqassaaq taamaattorli aamma maanna tuniluuttumut Omicronimut illersuuttaassasoq, Henrik L. Hansen nassuiaavoq.
Maanna akiuussusertittussat siusinnerusukkut ikinnerpaamik marloriarlutik akiuussusertissimassapput.
Inuit akiuussusertinnissaat Nunatta nakorsaaneqarfiata innersuussutigaa.
Maanna tunuluuttumut Omicronimut akiussutissaq immikkut sanaajugaluartoq, tamassuma tuniluunneq unitsissinnaanngilaa, tassa Omcroni tuniluutijasuarakasiummat. Tunillatsissimasut napparsimarujussuannginnissaat ukiaq manna akiuussusersuinermi siunertaavoq.
Utoqqaanerusut nualluummut akiuussusertinnissaat
Akiuussusersuinermi neqeroorut alla tassaavoq, inuit 65-ileereersimasut nualluummut akiussusertinnissaat.
Ukiut marlussuit ingerlanneranni killilersuineq annertusimanerat eqqarsaatigalugu, nualluut ukiaq manna atugaavallaassanngitsoq, oqartussanit ilimagineqartoq tusagassiuutinut nalunaarummi allaaserineqarpoq.
- Utoqqaat nualluummik napparsimapilunnginnissaat pillugu taakku akiuussusertinneqarnissaat innersuutigaarput, Henrik L. Hansen oqarpoq. Nualluummut akiuussusertinninermi coronamut akiuussusertittoqarsinnaasoq aamma oqaatigalugu.
Coronap ukiaq manna atugaanissaa eqqarsaatigalugu nunatsinni sutigut tamatigut killilersuisoqassanngilaq.
- Killilersuisoqannginnissaa naatsorsuutigaara. Tunillaassuuttut nutaat tuniluutiasuararsuupput taamaattumillu tunillaassuunneq pinngitsoortinneqarsinnaanngilaq, aamma 50-it sinnerlugit ukiullit akiuussusertissimappata napparsimanerat sakkukittuaraassaaq peqqinnissaqarfimmullu artukkiinissaa ernumassutaasariaqarnani, taama oqarpoq Henrik L. Hansen.
Nittartagaq corona.nun.gl atuutilersinneqaqqissaaq najukkamilu akiuussusersuinissamut piffissaq sumiiffillu paasissutissiissutigineqassallutik. Nunaqarfiit ilaat nunaqarfinnut tikeraarnermut atatillugu akiuussusertinnissamut neqeroorfigineqartassapput.
