Persuttaasarneq pillugu iliuutsit nersualaaraat
Alliaq 2017-imi misiliutitut aallartinneqartoq Isumaginninnermut Aqutsisoqarfiup upernaaq manna 2018-imi nalilersorpaa. Alliaq angutinut arnanullu persuttaasartunut persuttaasarnerminnillu taamaatitserusuttunut ikiuinissamut iluaqutaalluarsimasoq, tassani paasineqarpoq.
Nalilersuineq 2018-imi aallartinneqarmat katsorsarneqarsimasut 71-it nalunaarsorneqarsimapput. Angutit 53-it arnallu 15-it peqataasimallutik.
AAMMA ATUARUK Arnanut persuuttaasarneq akuererusunngilarput
Alliaq inunnut ataasiakkaanut tarnip pissusaanik ilisimasalimmit nalunaaquttap akunnerini arfineq pingasuni katsorsarneqarnissamik neqerooruteqartarpoq, aappaasumullu nalunaaquttap akunnerini marlunni katsorsaasoqartarluni.
Alliami katsorsaasut kisimik naliliinerivaat - taakkulu sullitatik aallaavigalugit namminneq inerniliineraat taamaattumik naliliineq nangaanartoqartinneqalaassasoq, Isumaginnermut Aqutsisoqarfik naliliivoq.
Kisitsisilli takutippaat, katsorsartikkusuttut amerliartortut.
AAMMA ATUARUK Kalaallit nakuuserfigineqartartut Danmarkimiittut ikiuiniarfigineqalersut
Tamatuma saniatigut suliniut Illernit Qeqertarsuarmi misiliutitut 2014-imi pilersinneqartoq naliliiffigineqarpoq.
Tassani arnanut persuttagaasimasunut taakkulu meeraannut nuna tamakkerlugu katsorsaaviutigaluni qimarnguimmi, katsorsaariaaseq aamma angusaqarluarsimasoq, 2017-imi aggustimi naliliisoqarpoq.
Illernit arnanut meeqqanullu perorsaanikkut isumaginninnikkullu siunnersuinissamik ilitsersuinissamillu neqerooruteqartarpoq, ilaqutariinnut sisamanut toqqissisimanartumik najugaqartitsisinnaalluni.
