Savalimmiormiut Mette Frederiksenip kissaataa malinnagu Israelimut nammineerniartut

Savalimmiormiut Israelimi sinniisoqarfeqarnissartik pilersaarutigaat, Jerusalemillu Israelip illoqarfiisa pingaarnersaattut akuersissutiginiarlugu. Pilersaarutit tamakku Danmarkip statsiministeriata Mette Frederiksenip siusinnerusukkut oqaatigisimasaanut kalluisinnaasut, aviisip Poltikenip allaaseraa.

Kalaallit Nunaata Savalimmiormiullu nunanut allanut tunngasunut politikkimut tunngatillugu nammineersinnaassuseqarnerulernissaat ammaffigalugu, Mette Frederiksenip ukioq manna siusinnerusukkut oqaatigaa:

- Ilaatigut isumaqataaffiginngisatsinni nammineersinnaanerulersinnaanissaat ammaffigaara, Mette Frederiksen oqarpoq.

Savalimmiormiulli Jerusalemimi sinniisoqarfeqalernissaannut Savalimmiuni naalakkersuisut pilersaarutaat pillugu statsministeri aperineqarmat, oqaatigaa Naalagaaffeqatigiit Israel pillugu inissisimanerat nunat Europamiittut inissisimanerannut naapertuuttoq.

AAMMA ATUARUK Mette Frederiksenip savalimmiormiut nunanut allanut politikkimi oqartussaaqataanerulersikkusukkai

- Sinniisoqarfiillu Tel Avivimi inissinneqartarnissaannik tamanna isumaqarpoq, Mette Frederiksen, Savalimmiuni nutaarsiassaqartitsivimmut KVF-imut oqarpoq.

Savalimmiormiut Israel nuannarigaat

Savalimmiulli nunanut allanut tunngasunut naalakkersuisuata Jenis av Ranap maanna oqaatigaa Jerusalemimi sinniisoqarfeqalernissamik eqqarsaatersuutit aallukkini.

- Sinniisoqarfimmik aappaagu 2020-mi ammaanissamut aningasaaliisoqarnissaa kissaatigereerparput, Jenis av Rana Politikenimut oqarpoq.

Kristumiussutsip Savalimmiuni pingaartinneqartorujussuunera, taassuma ilaatigut tunngavilersuutigaa, Savalimmiormiullu Israel asagaat oqaatigalugu.

- Suliap uuma, Frederiksenip Kalaallit Nunaata Savalimmiullu nunanut allanut tunngasunut nammineersinnaassuseqarnerusinnaanissaannut eqqarsaatersuutaanut kalluaasinnaavoq, Danmarkimimi naalakkersuisut inissisimanerannut atatillugu aporaaffeqarsinnaavoq, taamaammat qanoq pisoqarnissaa pissanngatigaarput, Savalimmiormiut nunanut allanut tunngasunut naalakkersuisuat Jenis av Rana oqarpoq.