Danskit aningaasaleeqataassappata aningaasarsiornermut iluaqutaassasoq
Naalakkersuisut Nuummi Ilulissanilu mittarfiit sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit allannguutissatut siunnersuutaanni taama ilaatigut allassimasoqarpoq.
Kangerlussuarmi Narsarsuarmilu mittarfiit qulimiguulinnuinnaq mittarfinngortinneqarpata, ullumi angallannerup aaqqissuussaaneranut naleqqiullugu inuiaqatigiinnut ukiuni tulliuttuni 25-ni 1,4 milliardit koruuninik sipaaruteqarfiunissaa, misissuinermi siusinnerusukkut missiliunneqarpoq.
Naalakkersuisut Nuummi Ilulissanilu mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit allannguutissatut siunnersuut saqqummiuteqqammerpaat, Attaveqaqatigiinnermullu naalakkersuisoqarfiup tassani ilaatigut missiliorpaa inuiaqatigiinnut sipaarutissat ukiuni tulliuttuni 25-ni 1,7 milliardit koruuniussasut.
AAMMA ATUARUK Kalaallit Airports 1 milliard koruuninik sipaaruteqarsinnaasoq
Inatsisartut Folketingimilu ilaasortat Danmarkip Kalaallit Nunaatalu akornanni isumaqatigiissut tapersersussappassuk, Kalaallit Airports A/S-ip erniatigut akiliuteqartarnikkullu sipaaruteqarfiunissaa, inuiaqatigiit sipaaruteqarnerunissaannut tunuliaqutaapput.
Kalaallit Airports A/S-immi isertitaasa pingajorarterutaat Naalagaaffimmut tutsinneqartalissapput, Danmarkimi Kalaalllit Airports A/S-ip pingajorarterutaanik piginneqataalissaaq.
Siumut siornatigut nalunaarutigineqarpoq Kangerlussuaq qulimiguulinnuinnaq mittarfinngortinnagu suluusalinnut mittarfittut ataannarnissaa partiimit kissaatigineqartoq.
Aaqqiissutissarlu taanna akisuvoq, 1,7 milliardit koruuninimmi sipaaruteqarfiunani 1,2 milliardit koruuninik sipaaruteqarfiussammat.
Aaqqiissut taanna taamaalilluni 500 millionit koruuninik naleqassaaq.
Nuummi Ilulissanilu mittarfiit 2200 meterinut tallineqarnerat, Qaqortumilu mittarfiliortoqarnera, sipaarutitut siuliani taaneqartut marluk iluanniipput.
