Kajumissutsiminnik sulipput - akissarsialerlutik

Grønlandsbankimi ingerlatsinermut pisortaq Carsten Pedersen ima oqarpoq:

- Isumassarsiaq pinngorpoq, isumaqaratta piumassuseqarluartunik sulisusoqarluta. Suliffeqarfeqarpugut pitsaalluinnartumik inuiaqatigiinnullu tunniusserusussuseqartumik, sulisuullutalu  nunatsinnut pitsaasumik tunniussaqarluarsinnaalluta.

Taamaasiornissigut suna pissarsiarissavisiuk?

- Naatsorsuutigilluinnarpara sulisut naammagisimaarinnissasut, isumaqarpungalu inuiaqatigiinni ikiuunnissatsinnut innuttaasut ikiorneqarnermikkut qujamasuutissaqarumaartut, Grønlandsbankimi ingerlatsinermut pisortaq Carsten Pedersen oqarpoq.

Sulisut nammineq kajumissutsiminnik sulerusuttut pillugit aaqqissuussineq suliffeqarfinnut allanut innersuussutigisinnallugu taanna oqarpoq, erseqqissaatigaluguli nammineq piumassuseqartoqartariaqartoq:

- Piumassuseq atorlugu ingerlataavoq namminerlu qinigassaalluni. Namminerlu tamanna qineraanni immikkut tunniussisoqassaaq, nalunngilara nunatsinni suliffeqarfiit anginerit ilaasa tamanna ingerlakkaat, Carsten Pedersen oqarpoq, nangillunilu:

- Nalunngilara Air Greenland allanik suleqateqarnikkut taamatut assingusunik pilersitsinikuuusoq, aammalu tamanna amerlasuut  peqataaffigigaat. Ajunngitsunillu pitsaaquteqarsinnaasunik pilersitseqataanikuullutik, aap, taamaattumik peqataarusuttut amerlapput. Isumaqarpungalu amerlasuut tamanna sapissanngikkaat, Carsten Pedersen GrønlandsBankimi ingerlatsinermi pisortaq oqarpoq.

Suliat suut aallukkumanerlugit Grønlandsbankimi sulisut namminneq aalajangersinnaassavaat, suliassallu suut aallukkumaneqarnersut, Carsten Pedersenip pissanngatigaa, naallu bankimi sulineq ulapaarfiusinnaagaluartoq, nammineq kajumissutsimik suliaqarnissaq periarfissaasoq oqaatigalugu.

- Isumaqaraanni pissanganartoq suliassarlu aaqqissuulluagaasimasoq, taava piumassuseqarluarluni sulisoqarsinnaavoq. Tamannalu tunngavigalugu pilersaarusiorluarluni nammineq kajumissutsimik sulerusuttoqarsinnaassasoq isumaqarpunga, oqarpoq.

Grønlandsbankimi sulisut namminneq kajumissutsiminnik suliaq aallarteriigaat tassaavoq Red Barnet suleqatigalugu, kalaallinik ilinniartunik siunnersuisarnissamik sulissuteqarneq.