Kajumissaatitut juullimi koorinnattut

GrønlandsBankenip Qaqortumi immikkoortortaqarfia ukiut tamaasa illoqarfimmut inuinullu immikkut suliniuteqartunut kajumissaasiisarpoq.

Tove Blidorff aamma Marie Olivia Hansen ukioq manna kajumissaaserneqarput. Aviisi Kujataamiu taama allappoq.

Tove Blidorff Qaqortumi nammineq piumassutsiminik suliniuteqarluartutut ilisimaneqarpoq. Taanna meeqqanik atuanngiffeqarnerminni angalanissaminnut periarfissaqanngitsunik asimut aasaanerani angalaartitsisarpoq.

- Nuannaarutigeqaarput illoqarfinnguatsinni najugaqaravit aammalu sulinerpit saniatigut nammineq piumassutsinnik suliniuteqartaravit. Meeqqat ajunngitsumik atugaqarnissaat anguniarit nalunngilarput, kajumissaasiisut ilaatigut taama Tove Blidorff-imut oqariartuuteqarput.

Tove Blidorff-ip ukiuni arlalinngulertuni peqatigiiffik Asiliat suleqataaffigisimavaa.

Kajumissaaserneqartup aappaa tassaavoq Maria Olivia Hansen. Taanna panimminut pingasunut anaanaavoq kisimiittoq.

Taassuma angajoqqaani utoqqalisut kajumissaarsimavai angallateerarseqqullugit. Taamaalilluni aasakkut qanittumut ungasissumullu angallattarpai. Angajoqqaanilu ilaanngikkaangata panini ilagalugit angalasarpoq, soorlu nunaqarfeeqqanut tikeraarlutik, imaluunniit aalisariarlutik nuniagiarlutilluunniit. Taamaalillutik ukiumi imminnut peqqumaasersortarlutik.

- Arnaavoq nukittooq, imminut naakkiginngitsoq, imminut inoqatiminullu ataqqinnittoq, inuunerminilu naleqartitaminik tunngaveqarluni inuusoq, Maria Olivia Hansenimut kajumissaasiisut ilaatigut taama oqariartuuteqarput.