Kaffinngersut Kalaallit Røde Korsiat ikiorpaat

Kalaallit Røde Korsianut aningaasat tunniussat Arctic Importip tuniniagaanit Kaffigooq-mit isertitaapput. Taakkuninnga nioqqutillit tassaapput Ilulissat Center Marked, Butik Natalie Nuussuaq, Rema Uummannami kiisalu Jope Nivilu Ilulissani. Kaffit poortat ataatsit tunineqaraanga 1 krone Kalaallit Røde Korsianut tuttussanngortinneqartarmat pisisartut Arctic Importip qujamasuutigai.

- Assut tulluusimaarutigaarput checki taama angitigisoq tunniussinnaagatsigu. Kalaallit Røde Korsit nersortarialimmik ukiut 20-it ingerlaneranni suliniarsimavoq neriuppugullu suli ukiorpassuarni taamatut ingerlajumaartut. Taamatulli suliniassagaanni aningaasarpassuit pisariaqarput, taamaammat aningaasat tunniussat ikittunnguugaluit aamma iluaqutaasarput, Arctic Importimi pisortaq Allan Frost oqarpoq.

Kalaallit Røde Korsiata aningaasat Arctic Importip tunniussai assut qujamasuutigai. Aningaasat taakku Røde Korsip sapaatip akunnerata naanerani nalliuttorsiualaarnerani tunniunneqarput. Arctic Import sinnerlugu Gitte Fredsbo tunniussisuuvoq.

- Aningaasat Røde Korsip immikkut ittumik Kalaallit Nunaanni suliniarneranut immikkut atugassanngortinneqassapput. Qularutissaanngilaq aningaasat sanngiinnerusortatsinnut iluaqutaajumaartut. Kalaallit Røde Korsianni nuna tamakkerlugu siulersuisut Arctic Importip 2007-miit suliniarsimanera qujamasuutigaarput, Kalaallit Røde Korsianni allaffimmi pisortaq Kirsten Mortensen oqarpoq.

Ukiuni aggersuni Arctic Importimi Kalaallit Røde Korsiat pissarsisarumaartoq pilersaarutaasoq Allan Frost oqarpoq.