Kangaatsiarmiut coronamut misissortissinnaanngitsut
Taamatullu inissisimaneq Kangaatsiami atuarfimmi pisortap, Sussi Adelholmip toqqissisimanartinngilaa.
- Ullumikkut aamma suli 30-t ataallugit atuariartorput. Ilinniartitsisut affai sinnerujussuarlugit aamma eqqugaaqqapput. Ilaatigut meeqqaminnik napparsimasoorlutik, namminnerlu aamma eqqugaallutik.
Kangaatsiami meeqqat atuarfianni pisortaq, Sussi Adelholm taama oqarpoq.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Kangaatsiami meeqqat atuarfianni atuartut katillutik 75-iupput, taakkunannga meeqqat 47-t coronavirusimik tunillatsissimanerminnik pasitsaasseqqallutik ataasinngornermi atuanngillat.
Aamma ilinniartitsisut 15-iusuni aqqanillit sulinngillat.
Innuttaasulli coronavirusernerlutik qulakkeersinnaanngilaat pilersuisummi pisiniarfiani nammine q misissuutissanik pisiassaqanngilaq. Pilersuisumiit tamanna uppernarsarpaat.
AAMMA ATUARUK Tamaat isigalugu: Coronavirus pillugu killiffik
- Kangaatsiami testeruteqannginnera sivitsortumik aamma peqqutaalluni amerlasoorparujuit nalorninartumiipput, coronarnerlutik coronannginnerlutik. Symptomii soorunami taakku aallaavigalugit imminnut taamatut napparsimatittut malunnarpoq.
Kangaatsiami nakorsiartitsivimmi pcr-imut misissuuteqartoq, Kangaatsiami nakorsiartitsivimmiit KNR-imut ilisimatitsipput. Taakkuli ikitsuinnaapput. Aamma peruluttunuinnaq sillimmataammata inunnut perulunngitsunut ersiuteqaannartunullu atorneqassanngitsut, Kangatsiami nakorsiartitsivimmmiit ilisimatitsipput.
Kangaatsiami coronavirusi tuniluuttoq, nunatta nakorsaanerata, Henrik L. Hansenip KNR-imut uppernarsarpaa.
Ersiutillit angerlarsimaannarlik
Illoqarfimmili tuniluunneq aallartippat antigentests atorlugu misissortinnissaq aalajangiisuunngitsoq, taassuma ilanngullugu oqaatigaa.
- Covid-19-imut ersiuteqaleraanni taava covid-19-ertutut imminut isigisariaqarpoq. Aammali illoqarfimmi allanik tunillaatiasunik piffissami tassani nappaalasoqarsinnaavoq, nunatta nakorsaanera oqarpoq.
Omikronitut tuniluutiatigisumik tuniluuttoqartillugu ilaqutariinni, paaqqinnittarfinni atuarfinnilu tuniluunneq pinngitsoorneqarsinnaanngitsoq, taanna allappoq.
Tunillatsittoqarsimatillugulu maleruagassat malinneqarnissaat taassuma innersuussutigaa. Tassa peqqissinissap tungaanut mattusimanissaq.
- Utoqqaat inuillu sakkortuumik nappaatillit tunillannaveeraaarnissaat pingaaruteqarpoq, nunatta nakorsaanera allappoq.
Kangaatsiap peqqissaaviata qulimiguulik Kangaatsiamut silarlunnera pissutigalugu sapaatip akunnera sinnerlugu tikissinnaasimanngitsoq paasissutissiissutigaa, taamaammat sukkasuumik misissuutinik PCR-imillu misissuutinik tikisitsisoqarsinnaasimanani.
Kangaatsiami napparsimmavimmi uninngasoqanngitsoq
Corona pillugu ullumikkut kisitsisit naapertorlugit Kangaatsiami napparsimmavimmi uninngasoqanngilaq. Nunatsinni napparsimmavimmi uninngasut katillugit qulingiluaapput.
Uninngasut Nuummi tallimaapput, Sisimiuni marluk, Paamiuni ataaseq Qaqortumilu ataaseq.
Tallimanngormamit ullumikkumut napparsimasut pingasut tassa Nuummi marluk Sisimiunilu ataaseq angerlartinneqarput.
Napparsimasunit sisamat corona pingaarnertut pissutigaat. Taakkunannga ataaseq Nuummi Dronning Ingriup Napparsimmavissuani peruluttut uninngavianniippoq.
Uninngasunit marluk covid-19-imik tunillatsissimanerat nappaataannut ajoqusernerannulluuniit allamut unitsitsissutaasumut sunniuteqarpoq.
Uninngasunit pingasut allamik pissuteqarlutik uninngapput. Taakku coronamik tunillatsissimanerat paasineqarpoq, tamannali uninnganerannut sunniuteqanngilaq.
Nakorsaaneqarfiuttaaq Sisimiuni Qaqortumilu coronamik tunillatsissimasunik toqusoqarsimasoq allappaa, taakkuli toqunerat coronamik pissuteqanngilaq, taamaattorli pissutaaqataasinnaalluni.
