Kaagerpassuit Dansk Folkepartiimut nassiussorneqarput

Danmarkimut nunasisut pisuullutik napparsimmavinni nakorsiartarfiillu utaqqisarfiini kaagit saftillu nunguttartut, Dansk Folkepartiip ilaasortaminut aviisiani allaaserineqareersorlu, partiip allaffeqarfianut Christiansborgimiittumut kaagerpassuit tunniunneqarput.
Allattoq Jaaku Lyberth
novembarip 16-at 2010 07:41

Nunasisut utaqqisarfinni kaagisorpallaarneqareersullu facebookimi quppernermik pilersitsisoqarpoq taaguutilimmik "Dansk Folkeparti kaagimik citronmågemik nassiguk", quppernermi tassani tapersersuisut 6.900-it sinneqalereerput.

Utaqqisarfinni kaagit akeqanngitsut tunniunneqartarunnaarnerannut nunasisut pisuutinneqarnerat unitsinniarlugu facebookimi quppernermik pilersitsisut akerliuniarnertik takutippaat.

Maannalu tassa Dansk Folkepartip allaffeqarfiani kaagerpassuarpoq, tusarfiit kingullit malillugit kaagit 200-t sinneqartut eqqunneqareerlutik.

Dansk Folkepartiip taamatut pissusilersornera qisuarfigineqarpoq.

- Pissutsit piviusut aallaavigineqanngillat, Danmarkimi nakorsat kattuffianni siulittaasoq Henrik Dibbern oqarpoq.

Dansk Folkepartiimi taamatut pissusilersorneq Socialdemokraatit kamaatigaat.

- Nakorsiartarfinni safteqarunnaarsimaneranik nunasisut pisuutissallugit ingasappallaaqaaq. Pissutsit piviusut imaapput, eqqiluisaarnissaq eqqarsaatigalugu utaqqisarfinni saftit tunniunneqartarunnaarput, naarlunnermik kinguneqartitsisarmata, Socialdemokraatit peqqinnissaq pillugu oqaaseqartartuat Sophie Hæstorp Andersen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq