Københavnip borgmesteria: Pitsaanermik iliuuseqarniarluta ilinniariarpugut
Kalaallit inuuniarnikkut ajornartorsiuteqartut ilaat ukiut tamaasa nunarput qimallugu Danmarkimi inuunermik nutaamik aallartitsiartortarput.
Danmarkimilu pitsaanerusumik inuuneqarnissamut takorluugaat piviusunngunngitsuukkajuttarput.
Taamaattumik isumaginninnermut borgmesteri Karina Vestergaard Madsen (Enhedslisten) Københavnillu kommuniani Isumaginninnermut ataatsimiititaliami ilaasortat qaammammi matumani siusinnerusukkut Nuummiipput. Taakku kalaallit inuuniarnermikkut ajornartorsiuteqartut qanoq pitsaanerusumik ikiorsinnaalernissaat ilisimasaqarfiginerulerniarpaat.
Aalborgimi kalaallit sisamaagaangata ataaseq angerlarsimaffeqanngitsuusartoq, Danmarkimi atugarissaarneq pillugu ilisimatusarfimmit misissuiffiusartumiillu, VIVE-mit nalunaarsuinermi allassimavoq. Odensemi kalaallit 15 procentii angerlarsimaffeqanngitsuupput, Københavnimilu kalaallit quliugaangata ataatsimit amerlanerusut angerlarsimaffeqanngitsuusarlutik.
Paasissutissarsiffik: VIVE.
- Kalaallinut inuuniarnikkut ajornartorsiuteqartunut Københavnimukartunut ikiuisarnerput naammassimanngilaq. Takusinnaavarput piffissap sivikitsunnguup iluani nikallortartut, taamaalillutik ikiaroornartunik sakkortuunik atornerluilerlutillu angerlarsimaffeqanngitsutut inuuneqalersarput. Taamaattumik kulturimit oqaluttuarisaanermit qanoq ittumik takkunnersut paasiniarusupparput, isumaginninnermut borgmesteri, Karina Vestergaard Madsen oqarpoq.
Aallartitat tikeraarnerminni inunnik assigiinngitsunik kalaallinik inuiaqatigiinnillu ilisimasalinnik naapitaqarput.
Inuuniarnikkut ajornartorsiuteqartuni kalaallit inuusuttut amerlanerpaasut
Angerlarsimaffeqanngitsut inuillu pisortanit ikiorneqarnissaminnik pisariaqartitsisut qimerlooraanni Københavnip kommuniani kalaallit amerlanerpaajupput.
Naak Karine Vestergaard Madsen taamaanneraanianngikkaluarluni suliaqartunit inuuniarnikkut ajornartorsiuteqarnerpaat nunatsinni inooqataaniarnertik unitsillugu aallaraangamik Københavniliarajunnerusartut tusartarpaa.
Inuit taakku ilaquttaminnut attaveqarunnaarsimasarput, ilinniartitaanermik, suliffeqarnermit ataatsimoornermiillu ilaajunnaarnikuusimasarput.
AAMMA ATUARUK Mange med grønlandsk baggrund er hjemløse i Danmark
Taakkunani kalaallit inuusuttorpassuit piumasaqaataasut malillugit inuuneqarniarnerminnik ilinniartitaanermik suliffeqarniarnermillu ajornakusoortitsisut aamma takussaapput:
- Tikeraarninni illoqarfinni imaluunniit nunaqarfinni inuusuttuuneq aamma ilinniariartuussagaanni aallaqattaartariaqarneq unammillernangaatsiartoq tusarpara. Tamatuma saniatigut ataatsimooqatissanik nutaanik nassaarniassapput ilaquttallu ungasissumiittut qimanneqarlutik, Karina Vestergaard Madsen oqarpoq.
Isumagininnermut borgmesterip oqarnera naapertorlugu ilisimalikkat taakku Københavnimi atorneqassapput, taamaalilluni inuit sullinniakkat paasineqarnerulersinnaassallutik.
Københavns Kommuniani Isumaginninnermut borgmester, Karina Vestergaard Madsen aamma Kommuneqarfik Sermersuumi borgmesteri Avaaraq Olsen.
Kalaallit Nunaannut ilisimasaqarnerulerneq ikiuilluarnerunissamut qulakkeerutaassasoq
Ataatsimut isigalugu Nuummut tikeraarneq kalaallinut naleqqunnerusumik ikiuinissamut atorneqarsinnaasorpassuarnik pissarsiffiuvoq.
Kommunimi sulisut akornanni Kalaallit Nunaannut ilisimasaqarnerulersitsinerup qulakkeernissaa aqqutissat ilagaat:
- Sulisunik kalaallisoorsinnaasunik aamma kalaallit oqaluttuarisaanerannik kulturiannillu paasisimasaqarluartunik atorfinititsisariaqarpugut, Karine Vestergaard Madsen oqarpoq.
Taassuma oqarnera naapertorlugu danskit kalaallit pillugit isummanik pigiliutiinnakkanik oqaluttuassarsianillu ukkatarinnippallaarnerat pissutigalugu tamanna pisariaqarpoq:
- Nunasiaateqarnikuuvugut. Kulturimik, nunamik, inunnillu aseruinikuuvugut. Ilerasuuteqarpugut, isumaqarpunga ”assannik isit asserneqarsimasut”, taamaalilluta Kalaallit Nunaata nunap qanoq ittuuneranik, kulturip qanoq ittunneranik inuillu qanoq ittuunerannik ilinniarnissamut sapiutipajaarluta, Karina Vestergaard Madsen oqarpoq.
Nunatsinni naatsorsueqqissaartarfik naapertorlugu kalaallit 17.000-it missaanniittut Danmarkimi najugaqarput. Taakkunannga 6.000-it missaat Københavnimi najugaqarlutik.
