Kalaallit Danmarkimi angerlarsimaffeqanngitsut amerlasut
Kalaallit Danmarkimi illoqarfinni angerlarsimaffeqanngitsut amerlapput, Aalborg Kommunemilu angerlarsimaffeqanngitsut 27 procentii nunatsinnit tunuliaqutaqarput.
DR.dk taama allaaserisaqarpoq.
Taamaammat nunatsinnit tunuliaqutallit angerlarsimaffeqalertinniarlugit allatut iliuuseqartoqartariaqarpoq.
Namminersorlutik Oqartussanik toqqaannartumik suleqateqarneq aqqutaasinnaasoq, Aalborg Kommunemi ilaqutariinnut suliffeqarnermullu ingerlatsivimmi politikkikkut qullersaagallartoq, Socialdemokraatineersoq Nuuradiin Hussein isumaqarpoq.
- Ajornartorsiutip qanoq iluarsiissuteqarfiginissaa ataatsimoorluta misissussavarput. Aalborg Kommunimmi kisimiilluni iluarsiiffigisinnaanngilaa. Sivisoorujussuarmik iluarsiissuteqarniarsarivugut. Allatut iliortoqarsinnaanersoq maanna misissussavarput, Hussein DR.dk-mut oqarpoq.
AAMMA ATUARUK Inuttut ajornartorsiuteqartut ikiorneqartariaqarput
Namminersorlutik Oqartussat qanoq suleqatigineqassanersut oqaatigissallugu maanna siusippallaarpoq.
Kisianni siusinnerusukkut iliuuseqartarnissamut tunngasinnaassasoq, Nuuradiin Hussein isumaqarpoq.
- Kommunip innuttaasunut ukununnga amerlasoorpassuarnik suliniuteqartarnissaa, ikorfartuisarnissaa neqerooruteqartarnissaalu naammanngilaq. Ajornartorsiutip aallaaviata iliuuseqarfiginissaa immaqa pisariaqassaaq, Hussein oqarpoq.
Aalborgimi angerlarsimaffeqanngitsut akornanni kalaallit taama amerlatiginerat arlalinnik nassuiaatitaqarsinnaavoq.
Ilaatigut nunarput Aalborgilu atassuteqarluarput.
Aamma inuuniarnikkut ajornartorsiutillit nunaminnit aallarniarunik Danmarkimi inuunissaq pilerinartissinnaasaraat, DR.dk allappoq.