Jørgen Fleischer pingasunngormat ilisaavoq

Jørgen Fleischer, Juuluaraq, tusagassiortoq, inuiaqatigiinni oqallissaarisoq, atuakkiartoq, politikeri sivikitsumik napparsimareerluni juunip 27-ani toqusoq, ullumi ilisaavoq.

- Jørgen Fleicher inuiaqatigiinni suliniarnermi mikinngitsumik iluaqutaasumillu suleqataasimasutut takorlugassaqarfigilersimavarput, qujassutissaqarfigalugulu, palasi Marianne P. Olsen oqaluussinermini ilaatigut taama oqarpoq.

- Minnerunngitsumillu nunatsinnut avammut nittarsaassilluartutut, kalaallinullu inuiannut ajunngitsumik siunertalimmik ikinngeqisunik pinngitsoorneqarsinnaanngikkaluartunik suliaqarsimasutut suli aamma oqaatigisinnaavarput, palasi naalagiartorpassuarnut Jørgen Fleischerigaluup, Atuagagdliutini ukiorpassuarni aaqqissuisuusimasup, Ikerasammi 1924-mut inunngortup, suliarpassuisa ilai pillugit oqarpoq.

Jørgen Fleicsher arlippassuarnik atuakkiaqarpoq taalliaqarlunilu erinarsussallugit amerlasoorpassuarnik nuannarineqartunik. Taalliaasalu nuannarineqarnerpaat ilaat ”Nature” oqaluffimmi erinarsoqartigiinnit erinarsorneqarpoq.

Palase Marianne P. Olsen erseqqissaavoq Jørgen Fleischerip allaaserisarpassui qagugumulluunniit piujuarumaartut  tammarallartussaanatik kinguaariippassuarni atuarneqartarumaarlutik. 

Tussiutigineqartut tassapput: Tarrippoq seqineq kitaanut, taalliortoq Pavia Petersen. Nersortigu qilammiu, taalliortoq Rasmus Berthelsen/Pavia Chemnitz. Angerlarfissaqarpoq pilluarfissamik, taalliortoq Andreas Hansen.

Jørgen Fleischer, Juuluaraagaluaq iliveqarfimmi Noorlerniittuni ilisaavoq.