Jyllandip avannaani suliffeqarfiit kalaallinik sulisoqarnerulissapput
AALBORG: Aalborgimi Kalaallit Illuutaanni pisortaq nutaaq taama isumaqarpoq - inuussutissarsiutinik ingerlatallit soqutiginnipput.
Kalaallit Nunaanniit Jyllandip avannaanut nutsertut amerliartortillugit kalaallinut suliffittaarniarneq unammillernartuuvoq.
Umiarsualivik sanaartornerlu
Kalaallit Illuutaanni Aalborgimiittumi pisortartaap Søren Stach Nielsenip tamanna maanna iliuuseqarfiginiarlerpaa, Jyllanip avannaamiut Kalaallit Nunaamiullu akornanni attaveqaatit pioreersut atorluarlugit.
- Jyllandip avannaa tassaavoq Kalaallit Nunaannik sorpassuarnik pilersuisuusoq. Illulu manna attaveqaaterpassuarnut ilaammat suliffissaaleqisunut maaniittunut atorluarniarpara.
Taamaattumik Søren Stach Nielsenip neriuutigaa suliffeqarfiit Kalaallit Nunaannik niuveqateqartut Jyllandip avannaani kalaallit suliffissaaleqisut nunarput pillugu ilisimasaat atorluarlugit sulisorilersinnaassangaat.
Pisortat avaqqullugit
Nunap immikkoortuani tamaani danskit akornanni suliffissaaleqineq annertuneruvoq, Aalborgimiittut suliffissarsioraangasa naliginnaavoq qaammaterpassuit ingerlareeraangasa aatsaat pisortanit suliffissamik neqeroorigineqartarlutik. Eqqarsarpunga illumi maani attavigisartagarpassuagut maannamiit atorluarnerujussuusariaqarigut, Søren Stach Nielsen oqarpoq.
Suliffeqarfiutillit attaveqaataanni "Erhverv Norddamnark"-imi siulittaasup tulliata Peter Freieslebenip eqqarsaat nersualaarpaa. Tassa suliffeqarfiit Jyllandip avannaaniittut Kalaallit Nunaannik suleqatillit kalaallinik amerlanernik sulisoqalernissaat. Tamannalu suleqatigiilernissaq siunertaralugu maanna Kalaallit Illuutaat Aalborgimiittoq attaviginialerpaa.
