Jyllandimi nerrivimmi arsaararluni pissartanngorniuunnermi kalaallit iluatsitsilluartut
Kalaallit nerrivimmi arsaararlutik nunanut allanut unammisartuisa inuusuttortaat tallimat Tjele Efterskolemi maannakkorpiaq atuartuupput. Efterskole taanna Danmarkimi kisiartaalluni nerrivimmi arsaararnermik neqerooruteqartuuvoq, kalaallillu neriunaatillit tassani atuarnermikkut siuariaatigisupilussuuaat.
-Kalaallit unammisartut pingasut sapaatip akunnerata naanerani Jyllandimi pissartanngorniuunnermut, Hobromi ingerlanneqartumut, peqataapput. Nukannguaq Søholm torrallaavippoq, Arnat Nukarlersaanni Arnallu U21B-vini marloriarluni pissartanngorami. Peqatigitillugu Nukannguaq aamma Arnat Nukarlersaanni bronzemik ujaminnappoq. Marco Jørgensen aamma ingerlalluarpoq, Nukarlerni C-mi nr. 2-nngorluni, Tommy Jørgensen, Kalaallit Nunaanni Nerrivimmi Arsaarartartut Kattuffianeersoq (BTTF) oqaluttuarpoq.
Nunamut allamut atuariartussanerluni aalajangerniarneq oqitsuinnaaneq ajorpoq, atuartulli tallimat nerrivimmi arsaarartartanermikkut imminnut ilisarisimareernerat oqinnerulersitsimavoq. Atuartut tallimaasut Tjele Efterskolemi atuarnerminni annertuumik pitsaasumillu sungiusartarput, tassanilu nerrivimmi arsaararnermik sammisaqarlutik atuartuusut 25-iupput.
-Atuarnerup saniatigut nerrivimmi arsaararnermik sungiusangaatsiartarput. Efterskolemi sapaatip akunneranut ikinnerpaamik pingasoriarlutik sungiusartarput peqatigitillugulu aamma Team Nørreå bordtennisimut ilaasortaapput, tassanilu aamma sungiusartarlutik. Unammisartut inuusuttunnguit Danmarkimiinnerisa affaata sinnerani GM-ertoqarneranilu ukiormanna Nuummi ingerlanneqartussami malittarinissaat assut pissanganassaaq, Tommy Jørgensen oqarpoq.
