Juumuut ernisussat ajunnginnerusumik peqquaat
Juumuut isumaqarput nunatsinni napparsimavinni tamani ilinniarsimasunik juumooqartariaqartoq.
- Erniffiusartut tamarmik nunatsinniittut ilinniarsimasunik juumooqartariaqarput, arlalinnimi ilinniarsimasunik juumoqanngilaq, tamakkunani sundhedsmedhjælperit imaluunniit ernisussiortumut ikiortit ernisitsisarput, juumuut iliniarsimasut oqaaseqartuat Dronning Ingridip Napparsimmavissuani juumuut pisortaat Ejla Størup oqarpoq.
Ilinniarsimasunik juumooqannginnermik ajornartorsiut nunatsinni sumi tamaaniippoq. Nanortalik, Narsaq, Qasigiannguit, Qeqertarsuaq aamma Ittoqqortoormiit ilinniarsimasunik juumooqanngillat.
Kisianni Narsami, Nanortalimmi Qasigiannguanilu ernisoqarsinnaasoq soorlu Qaanaami, Qeqertarsuarmi aamma Ittoqqortoormiuni ernisitsisoqarsinnaanngilaq.
Naartusut tarnikkut nanertuuteqarunik, soorlu ilagisat uiusorluunniit erninermi najuutinngimmat tamanna naartumut sunniuteqarsinnaasoq, Ejla Størupip aamma oqaatigaa.
Erniartortut ilaatigut ilatik qimassimasinnaasarpaat sapaatit akunnerini pingasuni tallimaniluunniit.
- Tamanna ilaqutariinnut nutaamik meerartaqalertunut ajunngitsumik toqqissisimanartumik aallartinnertut taaneqarsinnaanngilaq, taamaattumik juumuut politikerinut oqariartuutissaqarput.
-Sumiiffiit tamarmik erniffiusartut ilinniarsimasunik juumooqartariaqarput, tassa napparsimaviit tamarmik nunatsinniittut, Ejla Størup kaammattuivoq.
Nuummi tallimanik ilinniarsimasunik
juumooqarpoq aamma tallimat sinerissami. Arfineq-pingasut taartaasartuupput.