Juullip Inua nunarsuarmiut ilisimanerulissavaat

Tassami Nunarput nunarsuatsinni ilisimaneqarnerulissappat Juullip Inua atorluarnerusariaqarparput. Nunatsinni Takornariaqarnermi Inuutissarsiornermilu Siunnersuisoqatigiit maanna suliffeqarfik siunnersuinermik ingerlatalik INsitu suleqatigalugu Juullip Inua nunarsuarmut takoqqusaarnialerpaat. Siunnersuisarfimmi INsitu-mi pisortaq Poul Egede Jensen tamanna pillugu ima oqarpoq:

- Siornatigut Nunatsinni Juullip Inua sammigaangatsigu, Nunarsuarput eqqarsaatigalugu sammineqarpallaarneq ajorpoq. Nunatsinnut sammitinnerusaparput, taavalu avataaniit tikittussat utaqqimisaaginnartarlutigik, soorlu takornariat tikikkaangamik allakkerisarfimmik alakkaanissaat naatsorsuutigisarparput.

Massakkut pisimasut ilinniarfigalugit ingerlariaqqinniarpugut, soorlu nunarsuatsinni Juullip Inuanut tunngatillugu ajornartorsiutaasartut assigiiaartorujussuupput. Soorlu Juulip Inuanut allakkuit sumut nassiunneqassappat, qanorlu taakku akineqassappat. Juullip Inuanut qinnuteqaruit takkuttoqanngippat taava susoqassava? Imaluunniit Juullip Inuatut sulerusukkuma, tamanna kimit akuerineqassava?

Massakkut nalunngilara, soorlu Japanimit sianertoqartartoq, Juullip Inuatut allagartartaarusukkaluartunik. Apeqqutigalugu Kalaallit Nunaat taamaattumik allagartartaartitsisinnaanersoq. Uagullu tunniussassaqassanata.

Nunarsuarmiunut paasisitsiniaanissaq matuamni pineqanngilaq, suleqateqarnissarli pingaartinneqarneruvoq.

Assersuutigalugu Canadami Torontomi ukiut tamaasa juullimut atatillugu susassaqartitsisarput. Tassani soorlu taakku qanoq suleqatigineqarsinnaappat?

Aaqqissuussinerni taamaattuni oqarsinnaasariaqarput: Juulip Inuata nunaanniit tikeraartoqarpugut aamma oqarlutik Juullip Inuatut akuersissummik Nunatsinneersumik allagartaqarlutik. Aamma pisiniarfimminni suut tuniarsinnaassavaat? Tamakku soorlu suleqatigiissutigisinnaassavavut, Poul Egede Jensen oqarpoq.

Poul Egede Jensenip ilanngullugu oqaatigaa, nittartagaq Facebook atorlugu paasissutissanik aamma siammarterisoqarniartoq.