Juullimi tunissutisiat ima ilillutit utertissinnaavatit

Pisiniat tunngaviatigut pisiaminnik paarlaassisinnaatitaaffeqaratillu peqqissimisinnaatitaaffeqanngillat. Inatsisinut tunngatillugu tassa taamaappoq. Pisiniarfinnilli pisiniat pisiaminnik peqqisiminissaminnut imaluunniit tunissutisiamik naammaginngisamik pilerigisarinngisamilluunniit taarsiinissamut periarfissiinngitsunik nassaassaqanngilaq.

-Juullip kingorna nioqqutinik taarsiisitsisarneq pisiniarfiit tungaannit kiffartuussinerinnaavoq. Taamaattorli pisiniarfiit pisiniartumik qanoq sivisutigisumik taarsiisinnaatitaanissaannut assigiinngitsupilussuarnik piffissaliisarput. Ullunik arfineq-pingasunik, qaammammik ataatsimik sivisunerusumilluunniit periarfissiisoqarsinnaasarpoq. Nioqqutit juullip kingorna utertinneqarsinnaanersut, taamaaliortoqarsinnaappallu piffissaq taarsisinnaatitaaffik qanoq sivisutiginersoq pisiniarfinnut apeqqutigissallugu isumatusaarnerussaaq, atuisartunut siunnersorti Malene Lynge Atuisartunut Siunnersuisoqatigiinneersoq oqaluttuarpoq.

Nioqqutit tunissutissatut pisiarineqartut pisinermut allagartaat toqqussallugit aamma isumatusaarneruvoq. Pisiniarfiimmi amerlasuut nioqqutinik juulli sioqqullugu pisianut pisinermut uppernarsaatit takujumasarpaat. Aammali pisiniarfippassuit tunissutissat taarserneqarsinnaanerinut meqqilersuisarput, tassanilu nioqqut qaqugukkut utertinneqarsinnaanersoq allassimasarpoq.

-Pisiniartuttaaq eqqaamassavaat nioqqutissat taarsereerunikkit pisinermut allagartaq pisiniarfimmit tigujumassallugu. Imaassinnaavormi nioqqut pissusissamisuunngippat kingornatigut naammagittaalliutigineqartariaqalersoq. Naammagittaalliorsinnaatitaaneq pisinermit ukiuni marlunni atuuttarpoq, pisiniartulli nioqqutini akornutinik nassaarnermik kinguninngua naammagittaalliortariaqarput, Malene Lynge knr.gl-imut oqaluttuarpoq.

Malittarisassat uani atuarsinnaavatit:

http://www.atuisoq.gl/kl/Allaaserisat/2012/Peqqissimisinnaatitaaneq

http://www.atuisoq.gl/kl/Allaaserisat/2012/Pisisinnaatitaanerup-isumaa