Juullimi mattaat nutaarsuit
Juullikkunni Saqqami nutaarsuarnik mattattuussimapput, qilalukkat qaqortat qulingiluat missaat pisarineqarmata.
Piniartoq William Jensen angisuunik pingasunik pisaqarsimavoq.
-Assut nuannerpoq. Ukiarmili iluatsitsisarsimanngilagut silarluttarnera pissutigalugu, taama William Jensen KNRimut oqaluttuarpoq.
- Aamma qilalukkat Saqqamut takkunneri kingusikkami. Taamaattumik pisaqallaratta assut nuannerpoq, piniartoq William Jensen oqarpoq.
Nunaqarfimmiuttaaq nutaarsuarmik mattattugassaqalerlutik nuannassimapput. Juullip naligimmagu piniartut aallartut amerlasimanngillat.
William Jensen aatsaavissuaq juulliaqqami qilalugarpoq.
- Nalliuttut sapaassuillu ataqqivakka, taamaattumik ulluni taakkunani piniariarneq ajorpunga. Kisianni piffissami sivisuumi pisaqarsimannginnama, silagisseriarmat aallarsimavunga. Imaallaat mamartorsuarmik juullimi nerisaqarpugut, ajunngeqaaq, naak allanik aamma soorunami nerisaqartaraluarluta, William Jensen oqarpoq.