Meeqqat juullikkunni aalakkuttoqaraangat eqqugaanerpaasartut
Juulliarraq tassaanerarneqartarpoq meeqqat juulliat, meeqqalli ilaannut taamaanngilaq. Angerlarsimaffinni decembarip 23-ani aalakkuttoqarnera nakuusertoqarneralu meerarpassuit misigisarpaat.
Politiit juullikkunni aggersarneqaraangamik marlunnik pissuteqakkajuttartoq, Nuummi politiini pigaartuunerup, Lina Davidsenip, KNR-imut oqaluttuaraa.
- Politiit ulapinnerpaaffigisartagaat decembarip 23-ani aallartittarpoq 24-atalu ullaava ilanngullugu ulapaarfiusarluni. Orniguffigisagut tassaakkajuttarput nakuusernerit angerlarsimaffinnilu eqqissiviilliornerit, Lina Davidsen oqaluttuarpoq.
- Alianartua tassaavoq angerlarsimaffinni eqqissiviilliortoqaraanga ilaqutariit meerartallik takussaasarmata. Ajoraluartumillu meeqqat eqqugaanerpaasarput.
Lina Davidsenip aamma oqaluttuaraa angerlarsimaffinni eqqissiviilliortoqarsimatillugu inunnik isumaginnittoqarfik attavigineqartartoq, imalu ajortigisinnaasartoq allaat meeqqat angerlarsimaffimminnit peerneqarallartariaqartarlutik.
- Tupinnanngitsumik meeqqat sunnertisimaartarput aliasullutillu.
Decembarimi atornerluineq ersarinnerulertartoq
Imigassamik atornerluinerup juullikkunni ersarinnerulertarnera Red Barnetimi siulittaasup, Jonna Ketwap, oqariartuutigaa.
- Amerlanerit juullikkunni nuannersumik ilaqutariittullu katerisimaarnertalimmik juullisiortarput. Ilaqutariinnili arlalinni imigassartortoqarpallaarnera pissutaalluni assortuuttoqarlunilu eqqissiviilliortoqartarpoq. Taamaattoqartarnera meeqqat ersinerannik toqqissisimannginnerannillu kinguneqartarpoq, tassami angajoqqaat naatsorsoruminaallisarmata, Jonna Ketwa oqarpoq, nangillunilu;
- Imigassamik atornerluineq juulleriartornerani ersarinnerulertarpoq, tassami pinngitsuuisinnaanngitsut aalakoornissamut juullikkut patsisissatut atortaramikku.
Sooq decembarip 23-ani taama aalakkutsigisoqartarnersoq Lina Davidsenip, politiineersup, erseqqissumik akiuminaatsippaa. Taamaattoq pitsaanngitsunik ileqqoqarneq juullinngitsiarneranilu akissarsisarneq pissutaaqataasinnaasutut isigai. Red Barnet aamma taama isumaqarpoq:
- Juullinngitsiarnerani akissarsititsisarneq akunnakusoortortaqarpoq - ingammik meeqqanut imigassanut aningaasartuuteqangaatsiartartunik angajoqqaalinnut. Juullikkunni nuannaarnissaraluaq pakatsinermik juullikkunnilu tujorminartunik eqqaamasanik taarserneqartutullusooq ittarmat.
- Juulli tassaasussaagaluarpoq meeqqat nuannataarfissaat. Piffissani taamaattuni qanilaarneq, nuannersunik misigisaqarneq katerisimaarnerlu meeqqat pisariaqartippaat, Red Barnetimi siulittaasoq ulluinnarni tarnip pissusaanik ilisimasalittut sulisoq, Jonna Ketwa, oqarpoq.
