Juulli sioqqullugu akissarsisoqassanngilaq
Sulisut kattuffiit SIK, AK , PIP, IMAK aamma PPK, juulli sioqqullugu akissarsiat tunniunneqarsinnaanerat pillugu sulineq pillugu eqqartuussivimmut suliassanngortitsipput. Juullili sioqqullugu akissarsiat tunniuneqarsinnaanerannut suliassanngortitsineq juulli sioqqullugu naammassineqarsinnaanngilaq.
- Sulineq pillugu eqqartuussivimmut suliassanngortitsineq novembarip qeqqqata missaani tunniunneqarpoq, tamannalu kingusipallaarpoq juulli sioqqullugu naammassineqarnissaanut, Namminersorlutik Oqartussat sinnerlugit suliamik ingerlatsisoq advokat Wilhelm Malling oqarpoq. Taassuma ilanngullugu oqaatigaa, suliap juulli sioqqullugu naammassineqarnissaanut illutungeriit piumassuseqartut.
Illuatungeriit akuerisinnaasaannik sulineq pillugu eqqartuussinermi aqutsisumik pissarsiniarneq suliap aallartinneqarsinnaaneranut ajortorsiortitsivoq.
Kattuffiit sinnerlugit suliamik ingerlatsisoq advokat Peter Breum suliap aallartinneqarnissaaanut piareersimalluni oqarpoq, kisianni taanna Wilhelm Mallingitulli oqarpoq, sulineq pillugu eqqarsuussinermi aqutsisussamik pissarsinnaaneq juulli sioqqullugu iluatsissinnaanngitsoq.
- Danmarkimi Højesteret saaffigineqarsimavoq, kisianni tassani eqqartuussissuserisut ulapapippallaarnertik pillugu juulli sioqqullugu suliamik ingerlatsisinnaanatik oqarput, Peter Breum oqarpoq. Taassuma ilanngullugu oqaatigaa suliap aallartinneqarnissaanut piareersimalluni, taamaalillui akissarsiat juulli sioqqullugu tunniunneqarsinnaaniassammata.
Suliami inatsisitigut nalilersugassat piffissami sivusuumi peqqissaartumillu suliassaapput, taakkualu sulineq pillugu eqqartuussivimmi aqutsisup misissortussaavai, suliassallu taakku juulli sioqqullugu angumerineqarsinnaanngitsut Wilhelm Malling oqarpoq.
Taassuma naatsorsuutigaa, suliaq februaarip martsilluunniit qaammataani sulineq pillugu eqqartuussivimmi suliarineqarsinnaasoq.
Namminersorlutik Oqartussat apriilip qaammataani aalajangerpaat, akissarsiat juullip kingorna tunniunneqartassasut. Tamanna isumaqatiginagu sulisut kattuffii SIK, AK, PIP, IMAK aamma PPK Namminersorlutik Oqartussat sulineq pillugu eqqartuussivimmut suliassanngortitsipput, tamannalu novemberip qaammataata qeqqani tunniunneqarpoq.
