Juulli inissakilliorfiusarpoq

Juullikkunni naalagissanut ulikkaarussaasorpassuusarput. Tamanna pissutigalugu innuttaasut arlallit ilagiit sinniisaannut saaffiginnissimapput Nuussuarmi naalagiartoqarsinnaanera misissorneqarsinnaanersoq.

-Taamaattumik Atuarfik Hans Lynge Qinngutsinniittoq saaffigisimagaluarparput akineqarlutali atuarfik taamatut atorneqarnissaminut naleqqutinngitsoq,  palasi Marianne P. Olsen knr.gl-mut oqarpoq.

Atuarfiup itigartitsineranut tunngaviliutsinneqarpoq, atuarfik nutaajusoq pattagiaqanngimmat aammalu issiavinni amigaateqarmat 7. klasse tikiinnarlugu atuartitsiviusarnini pissutigalugu.

Nuussuup Atuarfia aamma oktoberi naalersoq saaffigineqarsimagaluarpoq, maannamulli suli akissutisiffiusimanngitsunik.

- Arlaannik nassaanngikkutta illoqarfiup oqaluffii marluk Annaassisitta Oqaluffia aammalu Hans Egedep Oqaluffia juullikkunni naammagiinnartariaqassavagut, Marianne P. Olsen oqarpoq.

Marianne P. Olsenillu siunnersuutigaa juullikkunni oqaluffimmi inissaq qulakkeerneqarsinnaasoq takkutiaarnikkut.

Oqaluffinni taakkunani katillugit inuit 800-t missaat naalagiarsinnaapput, Hans Egedep Oqaluffiani 450-t, Annaassisittalu Oqaluffiani 350-t.