2015 Nunatsinni politiinut ulapaarfioqqippoq
Nunatsinni pinerliinerit ukioq manna ikilisimaneri, Nunatsinni politiit qullersaata, Bjørn Tegner Bayip nuannaarutigaa.
- Ukiut qulit eqqarsaatigalugit Nunatsinni pinerliinerit ukioq manna tikillugu suli ikiliartorput. Tamannalu nuannaarutigiinnarsinnaavarput, Nunatsinni politiit qullersaat, Bjørn Tegner Bay, KNR-imut oqarpoq.
Persuttaanerit ikinnerit
Siorna 2014-imi annersaanerit 722 politiinit suliarineqartut ukioq manna qaammat manna ilanngullugu 650-niit 700-nut tungaanut amerlassuseqassasut, Nunatsinni politiit qullersaata, Bjørn Tegner Bayip naatsorsuutigaa.
- Pinerliinerilli suli amerlavallaarput tassami nunanut allanut assersuuttakkatsinnut naleqqiullugu suli amerlavallaarlutik, pinerliinerilli ikiliartorneri ilorraap tungaanut aallartutut oqaatigisariaqarpoq, Bjørn Tegner Bay oqarpoq.
Kinguaassiutitigut pinerliinerit ukiut qulit ingerlanerini amerlassusaat nikingaarsimanngilaq, tassa ukiut tamaasa pinerliinerit taamaattut 130-it 150-illu akornanni suliakkiutigineqartarmata.
Pinngitsaaliillunili arnerisarnerit amerlassusaat qasserpiaanesut politiit pisortaanerata qulakkeerlugu oqaatigisinnaannginnerarpaa oqarluni immaqa ikinnerulersimassasut.
- Pinngitsaaliilluni arnerinerit politiinut nalunaarutigineqartut amerlapput, taamaalilluta paasisagut amerlanerullutik. Tassalu tamannarpiaq pissutigalugu tamakku ikilisimasinnaaneri naatsorsuutigalutigu. Taamaattumik tamanna aamma nuannaarutigiinnarsinnaavarput, Nunatsinni politit qullersaat oqarpoq.
Pinerliisarnerit saniatigut politiit ukioq manna suliaqagaatsiarsimapput, tassa kunngikkormiut Nunatsinnut tikeraarnerat ulapputaagaatsiarsimagami.
- Tamanna politiit amerlasuut sulinerannik kinguneqarpoq taamatullu politiit umiarsui angalagaatsiarsimallutik. Taamaakkaluartoq tamanna suliat nuannernerit ilagaat, Bjørn Tegner Bay oqarpoq.
Politiit pinerliiniarnerit piareersimaffigisariaqarpaat
Københavnimi Parisimilu pinerliinerit aamma Nunatsinnut sunniuteqarsimapput.
- Ukiut tallimat matuma siornamut sanilliullugu Kalaallit Nunaata nuarsuarmioqataanera malunnarnerulersimavoq. Tamannalu pissutigalugu sungiusarnissat pisariaqarnerulersimallutik. Københavnimi Parisimilu pinerliinerit eqqarsaatigalugit taamaattoqariaannaanera maani aamma piareersimaffigisariaqarparput.
Tamassumalu piareersimaffigineqarnissaa uppernarsineqarpoq, tassa Nuummi pisiniarfeqarfissuarmut, tassani Naalakkersuisut ilaasa allaffeqarfigisaannut taamatullu Inatsisartut ataatsimiittarfiannut pinerliiniarnermik sioorasaarisoqarmat.
Taama pisoqanerani illorsuit taakku misissoqqissaarneqarput sulisullu aniatsinneqarlutik. Illorsuit taakku politiinit sakkulersorluarsimasunit misissoqqissaarneqaput.
- Pinerliinerit nunarsuatsinni amerliartortillugit tamanna isiginngitsuusaaginnarsinnaanngilarput taamaattumillu tamanna pisoq qisuariarfigalutigu, Nunatsinni politiit qullersaat, Bjørn Tegner Bay taama KNR-imut oqarpoq.
