Juullereernerani akissarsisitsisoqarnissaa kommunimi pisortap orniginartinneruaa
Kommunimi sulisut qaammammusiallit decembarip naalernerani akissarsisarnissaat, soorlu Namminersorlutik Oqartussani sulisut taamaattartut, Kommuneqarfik Sermersuumi Tungiuinermut Ingerlatsivimmi pisortap Aaja Chemnitz Larsenip orniginartinneruaa. Inuit kommunip inunnik isumaginnittoqarfianut saaffiginnittartut januaarip naajartulernerani amerlisarnerat, taassuma eqqarsaatigai:
- Juullinngitsoq akissarsisitsisarneq januaarimi malugisarparput. Ilaqarpugut januaari qiteqqusimatsiaannartoq aningaasaataaruttartunik. Inuit aningaasatigut ikiorneqarnissartik pillugu saaffiginnittartut taamaammat malugisarparput, Aaja Chemnitz Larsen oqarpoq.
Kommuneqarfik Sermersuumi Tungiuinermut Ingerlatsivimmi innuttaasunillu sullissivimmi tamassuma nalaani ulapputtoqartartoq, taassuma oqaatigaa, akissarsisitsisarnerillu isumaqatigiissutit malittuuginikkit inuit naammattusaarisinnaalissagaluarput, oqarpoq:
- Inuit ilaasa aningaasaatimi amerlanersaat decembarimi atoreersimasarpaat, januaarilu aallartiinnartoq aningaasaateqarpiaratik. Juullereerpat aatsaat akissarsisoqarnissaanik Naalakkersuisut ukioq manna apriilimi siunnersuutaat taamaammat tapersersorpara, Aaja Chemnitz Larsen oqarpoq.
Kommuneqarfik Sermersuumi borgmesteri Asii Chemnitz Narup sulisut akissarsisarneri pillugit oqaaseqarumanngilaq, akissarsisitsisarnermut tunngasut atorfilittatigut aqunneqartarnerat innersuussutigalugu. Kommuneqarfik Sermersuup pisortaaneranut Søren Hald Møllerimut innersuussivoq.
Juullip siorna kingornaluunniit akissarsisitsisarnerit tamarmik immikkut ittumik iluaqutissartaqartut, Søren Hald Møllerip oqaatigaa:
- Juullilernerani akissarsitsisarneq inunnik isumaginninnermut atatillugu iluaqutissaqarpoq, soorlu aamma juullereernerup kingorna akissarsisitsisarneq iluaquteqartoq. Inunnik isumaginnittoqarfimmut januaarimi saaffiginnittartut amerlisarnerannik, Aaja Chemnitz Larsenip oqaaseqarnera ilumoortortaqartoq qularutiginngilara. Tapisiaqartitsisarnerilli allanngortinneqassappata tamanna politikerit aalajangiiffigisussaavaat, taamaammat tamanna annerusumik oqaaseqarfigisinnaanngilara, Kommuneqarfik Sermersuumi pisortaaneq Søren Hald Møller oqarpoq.
Qaasuitsup Kommuniani inunnik isumaginninnermut ingerlatsivimmi pisortaq, Magga Fencker, akissarsisitsisarnerit pillugit oqallinnermut peqataanianngilaq.
Kommune Kujallermi fagchefi Kiista P. Isaksen, aamma Qeqqata Kommuniani Ilaqutariinnermut ikiorsiisarnermullu immikkoortortaqarfimmeersoq Leif Grønvold oqarput juullilernerani akissarsisitsisarneq inunnik isumaginnittoqarfinnut annerusumik maluginiarneqarneq ajortoq.
