Juulimaaq qallunaaq iluarineqarpallaanngilaq
Pisoq 2006-imi aallartippoq, taamani aningaasaateqarfik, Santa Claus of Greenland, aningaasanut inatsimmit peerneqarmat taamaattumillu matusariaqarluni. Tamatuma siunerujussuatigut tassa 1990-ikkunnili, qallunaaq juulimaaq Ole Lundsgaardimik atilik, aningaasaateqarfimmut attuumassuteqartoq, oqariartuuteqaraluarpoq aningaasaateqarfiup matunera sullissiunnaarneralu pissusissamisuunngitsoq.
- Tamatuma kingorna uanga nammineq akuersissummik peqarlunga ingerlaannarpunga. Qujanartumillu diplominik skaaviga ulikkaarpoq. Juulimaaq Finlandimeersoq attavigiuarpara, taannami oqartarmat soorunami juulimaaq Finlandimeersuusoq. Taamaattumiguna uanga diplominik agguaasarnera ingerlatiinnariga, taanna assortorniarlugu, Ole Lundsgaard oqarpoq nangillunilu:
- Kalaallit Nunaat nuannareqaara aamma Kalaallit Nunaat sullippara, uanga nalunngilara juulimaaq Kalaallit Nunaanneersuusoq.
Aningaasaateqarfik Santa Claus of Greenland matummat, Nuuk Tourismip aningaasaateqarfiup ingerlatai aallutilerpaat, taamaattumilluuna Nuuk Tourismip pisortaata, Therese Kreutzmannip Ole Lundsgaardip suliai nuannarivallaanngikkai.
- Ajuusaarnarpoq ingerlatani ingerlatiinnarmagu, tassami aningaasaateqarfik atorunnaarsinneqarpat ilaaliinnarluni ingerlateqqissinnaanngilaa, taamaaliorporlumi akisussaasunut paasititseqqaarani, Therese Kreutzmann oqarpoq.
Kalaallit Nunaata juulimaava nunarsuatsinni tusaamasaaqqilernissaa anguniarlugu, Nuuk Tourism maanna suliniuteqarpoq. Theres Kreutzmann Ole Lundsgaardimut assuarliutaannarnik isumaqanngilaq:
- Taamatut ingerlatsinera ajoriinnagassaanngilaq, tassami uangut suliniutigut aamma taamatut siunertaqaramik. Taamaattorli suliap ataqatigiissarnissaanut pisariaqartitsivugut, taamaattumik taaguutip atornerlunneqarnissaa sianigisassaavoq, Therese Kreutzmann naggasiivoq.
