Julie katissuserluni assilisittoq

Arnat naartusut katinnissaminnillu pilersaaruteqartut tamatigugajak katinnissartik meeraartaareernerminnut kinguartittarpaat.

Julie naartuvoq, sulili katinnissaminik pilersaaruteqarluni tamanut nalunaarutiginagu. Taamaakkaluartorli atuagassiamit Brudenimit aperineqarami naartunermini kjolenik katissutinik atorluni assiliseqattaarsinnaanersoq, tamatumunnga akuersisimavoq.

Akuersineralu pitsaasumik siunertaqarpoq. Naartusunut kjolenik mersortartut atuagassiarlu, Bruden peqatigiillutik assilisaat atorneqartut, aningaasat 52.800 koruunit meeqqanut ikiuiniaqatigiiffimmut NANU-børnimut tunniunneqassappata, Julie Berthelsen assiliseqattaarnissaminut akuersisimavoq.

- Meeqqanut suliniaqatigiiffiup, NANU-børnip aallarteqqammersup aningaasat atorfissaqatippai, uangalu taakku suliniarnerat tapersersorluinnarpara, taamaattumik assiliseqattaarsinnaanissannik aperineqarama erngiinnaq akuersivunga, Julie Berthelsen oqarpoq, nangillunilu oqaatigalugu kjolet ooqattaartakkani kusanaqimmata assiliseqattaarneqarnini nuannarisimallugu.

- Naak naartugaluarlunga kjolet assigiinngitsorpassuit ateqattaarlugit assiliseqattaarama allaanngilaq kunngissap nuliassaa assiliseqattaaginnallartoq, Julie Berthelsen oqarpoq.

Taanna aappanilu assammik arsaattartoq, Minik Dahl Høegh februaarimi meerartaassapput.